ఇంట్లోకి సరుకులు కొంటున్నారా? ఇలా డబ్బు ఆదా చేసుకోండి!

Grocery Shopping: దుస్తులు కొనుగోలు చేయడానికే కాదు.. కిరాణా సరుకులు కొనడానికి కూడా పెద్ద పెద్ద మాల్స్​కు వెళ్లడం అలవాటైపోయింది జనాలకు. ఇలా వెళ్లడానికి కారణాలు ఏమైనప్పటికీ.. మాల్​ నుంచి బయటకు వచ్చి చూస్తే మాత్రం.. జేబుకు పెద్ద చిల్లే పడి ఉంటుంది. కొన్ని టిప్స్ పాటించడం ద్వారా.. డబ్బు సేవ్ చేసుకోవచ్చు. అవేంటో ఇప్పుడు చూద్దాం.

Groceries Shopping Tips in Telugu: ప్రతి నెలా ఇంటికి కావాల్సిన కిరాణా సరుకులు కొనుగోలు చేసేందుకు చాలా మంది సూపర్ మార్కెట్లకు, మాల్స్​కు వెళ్తుంటారు. అన్నీ ఒకేదగ్గర దొరుకుతాయనో.. ధర ఒకటీరెండు రూపాయలు తక్కువగా ఉంటుందనో వెళ్తుంటారు. అయితే.. కొనుగోలు పూర్తయ్యే సరికి బడ్జెట్ దాటిపోయి ఉంటుంది. ఈ పరిస్థితి రాకుండా ఉండాలంటే.. కొన్ని టిప్స్ పాటించాల్సి ఉంటుంది.

లిస్ట్​ తయారు చేసుకోండి: ఇంట్లో కావాల్సిన వస్తువులు, సరుకులు కొనేటప్పుడు బడ్జెట్ ముందుగా ప్రిపేర్ చేసుకోవడం చాలా ఇంపార్టెంట్. ప్రతి ఒక్కరూ దీన్ని పాటించాలి. దీనికోసం.. సూపర్ మార్కెట్‌ లేదా మాల్స్​కు వెళ్లడానికి ముందే.. మన ఇంట్లో ఏం ఉన్నాయో చూసుకోవాలి. లేనివాటితో ఓ లిస్ట్ తయారు చేసుకోవాలి. దీనివల్ల.. ఇంట్లో వస్తువులు ఉండగానే మరోసారి కొనుగోలు చేయాల్సిన అవసరం రాదు.

హద్దు దాటొద్దు : మీరు ఎప్పుడు ఎలాంటి షాపింగ్​కు వెళ్లినా.. ఒక రూల్ పెట్టుకోవాలి. అదేమంటే.. మీరు కచ్చితంగా లిస్టు తయారు చేసుకొని వెళ్లాలి. అంతవరకే కొనుగోలు చేయాలి. ఎంత ఊరించినా సరే.. మీ లిస్టులో లేని వస్తువు కొనుగోలు చేయకూడదు. చాలా మంది డబ్బు దుబారా చేసేది ఈ విషయంలోనే! 10 వస్తువులు కొనడానికి వెళ్లి.. పాతిక వస్తువులు ఇంటికి మోసుకెళ్తుంటారు. ఇలాంటి పరిస్థితికి వెంటనే చెక్ పెట్టగలిగితే.. చాలా డబ్బు ఆదా అవుతుంది.

ఆఫర్ల మాయలో పడకండి : ఒకటి కొంటే మరొకటి ఫ్రీ అనో.. మూడు కొంటే కొంత డబ్బు కలిసి వస్తుందనో.. ఆఫర్లు కుప్పలు తెప్పలుగా కనిపిస్తాయి. ఆ వైపు కన్నెత్తి కూడా చూడొద్దు. మీ దృష్టి మీ లిస్టు మీద మాత్రమే ఉండాలి. ఎలాంటి ఆఫర్లు ఎంత ఊరించినా.. బడ్జెట్​ దాటివెళ్లకండి.

ఎక్స్​పైరీ డేట్ చెక్​ చేయాలి: కొంత మంది ఆఫర్లు ఉన్నాయి కదా అని వెనకా ముందు చూడకుండా ఎడాపెడా కొనేస్తారు. ఒక సరుకును ఆఫర్లో పెట్టారంటే.. అప్పుడు ఖచ్చితంగా ఎక్స్​పైరీ డేట్ చూసుకోవాలి. ఇలా చెక్​చేయడం వల్ల సరుకులు పాడవకుండా ఉంటాయి. ముఖ్యంగా తిను బండారాలు తీసుకునేటప్పుడు ఖచ్చితంగా చూడాలి. వస్తువులు కొన్నప్పుడు లేబుల్స్ చెక్ చేయండి. ఎక్స్‌పైరీ డేట్ దాటిపోయిన వస్తువులు కొంటే.. వాటితో ఇబ్బందులు రావడంతోపాటు డబ్బు దుబారా అయిపోతుంది.

క్యారీ బ్యాగ్ తీసుకెళ్లండి : సరుకులు కొనడానికి వెళ్లిన ప్రతిసారీ ఓ కొత్త క్యారీ బ్యాగ్​ తీసుకొస్తారు చాలా మంది. దానికి అదనంగా డబ్బులు చెల్లించాల్సి ఉంటుంది. అలా కాకుండా.. గుర్తు పెట్టుకొనిమరీ క్యారీబ్యాగ్ వెంట తీసుకెళ్లాలి. పైన పేర్కొన్న టిప్స్ పాటించడం వల్ల మీ డబ్బుతోపాటు టైమ్ కూడా ఆదా అవుతుంది.