Honour killing in bihar: పరువు కోసం కన్నకూతురినే పొట్టన పెట్టుకున్నాడు ఓ వ్యక్తి. 'నాన్న నన్ను చంపకండి ప్లీజ్.. నేను మీ కూతురిని, నన్ను వదిలేయండి' అంటూ ఆమె బతిమాలుతున్నా కనికరించలేదు. తండ్రి వయసు ఉన్న వ్యక్తితో నిశ్చయించిన పెళ్లిని కాదని మరో వ్యక్తిని ప్రేమించడమే ఆ అమ్మాయి చేసిన తప్పు. ఎంత బతిమలాడినా ఆ తండ్రి రాతిగుండె కరగలేదు. కుమార్తెను దారుణంగా హింసించి ఆపై హత్య చేసి మృతదేహాన్ని గ్రామంలోని చెరువులో పడేశాడు. ఇదంతా బిహార్లోని దర్భంగా జిల్లా రతన్పుర గ్రామంలో నెల రోజుల క్రితం జరిగింది. అయితే ఇందుకు సంబంధించిన ఓ ఆడియో వైరలవడం వల్ల ఈ విషయం వెలుగులోకి వచ్చింది.
'నన్ను వదిలేయండి నాన్న'..: తండ్రి కుమార్తెను హత్య చేస్తున్న సమయంలో ఆమె బాయ్ఫ్రెండ్ రికార్డ్ చేసిన ఓ ఆడియో ప్రస్తుతం వైరలైంది. 'నాన్న నన్ను చంపకండి ప్లీజ్.. నేను మీ కూతురిని, నన్ను వదిలేయండి' అని 20 ఏళ్ల అఫ్రీన్ తండ్రి ఉస్మాన్ను వేడుకోవడం అందులో రికార్డ్ అయింది. ఏప్రిల్ 15న అఫ్రీన్ను హత్య చేసిన ఉస్మాన్.. మృతదేహాన్ని చెరువులో పడేసి.. కుమార్తె ప్రమాదవశాత్తు చెరువులో మునిగి మృతిచెందినట్లు నమ్మబలికాడు. మరుసటి రోజు మృతదేహాన్ని వెలికి తీసిన పోలీసులు అఫ్రీన్ నీటమునగడం వల్లే మృతిచెందిందని భావించి ఎలాంటి కేసు నమోదు చేయలేదు.
ఎవరికైనా చెప్తే చంపేస్తా..: 'అఫ్రీన్ హత్య విషయం బయట ఎక్కడైనా తెలిసిందంటే ఆమెకు పట్టిన గతే మీకు కూడా పడుతుంది' అంటూ కుటుంబసభ్యులను బెదిరించాడు ఉస్మాన్. దీంతో అతని భార్య షబానా ఖాతునా, ముగ్గురు పిల్లలు.. నెల రోజుల పాటు ఈ విషయాన్ని ఎక్కడా చెప్పకుండా గుట్టుగా ఉంచారు. కానీ ఉస్మాన్ బెదిరింపులకు భయపడి రక్షణ కోసం వాళ్లు ఈనెల 21 పోలీసులను ఆశ్రయించడం వల్ల అసలు విషయం బయటపడింది. దీనిపై స్పందించిన పోలీసులు.. ఘటనపై సమగ్రంగా దర్యాప్తు చేపడుతున్నామని.. వైరలైన ఆడియోకు హత్య సంబంధం ఉందా లేదా అనే కోణంలో కూడా కేసును దర్యాప్తు చేస్తామని తెలిపారు.
మహిళా కానిస్టేబుల్పై అత్యాచారం..: మరోవైపు.. మహారాష్ట్రలోని పాల్గఢ్లో ఓ పోలీస్ సహాద్యోగినిపై అత్యాచారానికి పాల్పడ్డాడు. పెళ్లి చేసుకుంటానంటూ నమ్మించి అనేక సందర్భాల్లో తనపై నిందితుడు అత్యాచారానికి పాల్పడ్డాడని బాధితురాలు ఫిర్యాదులో పేర్కొంది. దీనిపై కేసు నమోదు చేసిన అధికారులు దర్యాప్తు చేపడుతున్నారు.
బెయిల్ త్వరగా రాలేదని..: బెయిల్ త్వరగా ఇప్పించనందుకు స్నేహితుడిని హత్య చేశారు ఇద్దరు వ్యక్తులు. ఈ ఘటన మధ్యప్రదేశ్లోని జబల్పుర్లో జరిగింది. నిందితులను సిద్ధార్థ్ శ్రీవాత్సవ, గౌరవ్గా గుర్తించిన పోలీసులు.. మంగళవారం వారిద్దరినీ అరెస్ట్ చేశారు. మే 16న జయదీప్ రాఠోడ్ను అతని నివాసంలోనే నిందితులు హత్య చేశారని పోలీసులు తెలిపారు.
నిందితుడు శ్రీవాత్సవ, రాఠోడ్ సహా విశ్వకర్మ అనే మరో వ్యక్తి ఓ క్రిమినల్ కేసులో జైలు శిక్ష అనుభవించారు. ఈ క్రమంలో ఏడాదికే బెయిల్పై బయటకు వచ్చిన రాఠోడ్.. స్నేహితులకు త్వరగా బెయిల్ ఇప్పిస్తామని హామీ ఇచ్చాడు. మరో ఏడాదిన్నర తర్వాత విశ్వకర్మకు బెయిల్ రాగా.. 2017లో జైలుకు వెళ్లిన శ్రీవాత్సవ గతేడాది వరకు లోపలే ఉన్నాడు. ఆలస్యంగా బెయిల్ రావడం వల్ల ఆగ్రహం వ్యక్తం చేసిన శ్రీవాత్సవ.. గౌరవ్ అనే వ్యక్తితో కలిసి ఈ హత్య చేశాడు.
ఇదీ చూడండి : ఐదేళ్ల బాలికపై రేప్.. రూ.70 లక్షలు ఎగ్గొట్టి మహిళపై అత్యాచారం
