కూలిన ఆర్మీ హెలికాప్టర్​- ఇద్దరు పైలట్లు మృతి

జమ్ముకశ్మీర్​లో సైనిక హెలికాప్టర్ కూలిపోయింది. ఈ ఘటనలో ఇద్దరు పైలట్లు మరణించారు. ఉధమ్​పుర్​ జిల్లాలో మంగళవారం ఉదయం ఈ ఘటన జరిగింది.

జమ్ముకశ్మీర్​లో సైనిక హెలికాప్టర్ కూలిపోయినట్లు అధికారులు తెలిపారు. ఈ ఘటనలో పైలట్లు ఇద్దరు ప్రాణాలు కోల్పోయారని చెప్పారు. జిల్లాలోని శివగఢ్​ ధర్​ ప్రాంతంలో మంగళవారం ఉదయం 10.30-10.45 సమయంలో ఈ ఘటన జరిగినట్లు పేర్కొన్నారు.

పైలట్​ను కాపాడిన స్థానికులు

హెలికాప్టర్ క్రాష్ అయిన తర్వాత అందులో ప్రయాణిస్తున్న పైలట్లను స్థానికులు కాపాడారు. వీరిని ఆస్పత్రికి తరలించారు. అయితే, దురదృష్టవశాత్తూ అక్కడ చికిత్స పొందుతూ.. పైలట్లు ఇద్దరూ చనిపోయారు.

ప్రమాదానికి గురైన హెలికాప్టర్​.. ఆర్మీ ఏవియేషన్ కార్ప్స్​కు చెందినదని అధికారులు స్పష్టం చేశారు. మారుమూల ప్రాంతంలో ఈ ఘటన జరగడం వల్ల అక్కడకు చేరుకోవడానికి సమయం పట్టినట్లు పేర్కొన్నారు.

ఇదీ చూడండి: Viral Video: మెడకు బెల్ట్​ కట్టి.. యువకుడిపై కర్రలతో దాడి