సాగు చట్టాలకు వ్యతిరేకంగా నిరసన చేస్తున్న ఓ రైతు ఆత్మహత్య చేసుకున్నాడు. టిక్రీ సరిహద్దుకు రెండు కిలోమీటర్ల దూరంలోని ఓ చెట్టుకు ఉరేసుకొని బలవన్మరణానికి పాల్పడ్డాడు. రైతును హరియాణాలోని జింద్ ప్రాంతానికి చెందిన కరమ్వీర్ సింగ్(52)గా పోలీసులు గుర్తించారు. ఆదివారం ఉదయం కరమ్వీర్ మృతదేహాన్ని కనుగొన్నట్లు వెల్లడించారు.
రైతు ఓ సూసైడ్ నోట్ను వదిలి వెళ్లాడని, దాన్ని నిర్ధరించాల్సి ఉందని పోలీసులు తెలిపారు. సాగు చట్టాలపై ప్రతిష్టంభన కారణంగానే రైతు మరణించినట్లు సూసైడ్ నోట్ ప్రకారం తెలుస్తోంది. 'రైతు సోదరులారా.. మోదీ ప్రభుత్వం(చర్చల కోసం) తేదీల మీద తేదీలను ప్రకటిస్తోంది. ఈ నల్ల సాగు చట్టాలను ఎప్పటికి వెనక్కి తీసుకుంటారో ఎవరికీ తెలీదు' అని నోట్ పేర్కొంది.
పదిహేను రోజుల క్రితం హరియాణాకు చెందిన ఓ రైతు కూడా టిక్రీ సరిహద్దు సమీపంలో విషం తాగి ఆత్మహత్య చేసుకున్నాడు. పంజాబ్కు చెందిన ఓ న్యాయవాది, సిక్కు మతగురువు సంత్ రామ్ సింగ్ కూడా సాగు చట్టాల ఉపసంహరణపై ప్రతిష్టంభన నేపథ్యంలో బలవన్మరణానికి పాల్పడ్డారు.
ఇదీ చదవండి: మరో ఉద్యమానికి టికాయత్ పిలుపు
