తన తల్లి మతం మార్చుకోవడంపై (Religious Conversion in Karnataka) కర్ణాటక భాజపా ఎమ్మెల్యే గూలిహట్టి శేఖర్ (Gulihatti Shekar) ఆవేదన వ్యక్తం చేశారు. క్రైస్తవ మిషనరీలు అమాయకులను లక్ష్యంగా చేసుకొని మత మార్పిడి చేయించుకునేలా ప్రోత్సహిస్తున్నాయని (Christian Conversion) ఆరోపించారు. ఈ నేపథ్యంలో బలవంతపు మత మార్పిళ్లకు వ్యతిరేకంగా చట్టాన్ని తీసుకురావాలని కర్ణాటక అసెంబ్లీలో ప్రతిపాదన చేశారు.
"ఒక మతం నుంచి మరో మతానికి మారిపోవడం విస్తృతంగా జరిగిపోతోంది. నా నియోజకవర్గంలో 10-20 వేల మంది మతం మార్చుకున్నారు. నా తల్లి కూడా మతం మారిపోయింది. క్రైస్తవ మిషనరీలు అమాయకులను లక్ష్యంగా చేసుకొని బ్రెయిన్ వాష్ చేస్తున్నాయి. నా తల్లి విషయంలోనూ అదే జరిగింది. నా తల్లి మొబైల్ రింగ్టోన్ కూడా ఆ మతానికి సంబంధించినదే ఉంది. మా ఇంట్లో హిందూ దేవతలను పూజించడం లేదు. ఇది చాలా ఇబ్బందికరంగా అనిపిస్తోంది."
-గూలిహట్టి శేఖర్, ఎమ్మెల్యే
దళితులు, బీసీలు, ముస్లింలను మత మార్పిడి చేసుకునేలా ప్రోత్సహిస్తున్నారని క్రైస్తవ మిషనరీలను (Christian Conversion) ఉద్దేశించి ఆరోపించారు ఎమ్మెల్యే శేఖర్. మతం మారిన ఎస్సీ, ఎస్టీలకు రిజర్వేషన్లు రద్దు చేయాలని డిమాండ్ చేశారు. దీనికి సంబంధించి చట్టపరంగా కఠిన చర్యలు తీసుకోవాలని అన్నారు.
మరో ఎమ్మెల్యే బోపయ్య.. శేఖర్ ప్రతిపాదనకు మద్దతు పలికారు. యూపీ తరహా చట్టాన్ని అమలు చేయాలని కోరారు.
బిల్లు తెస్తాం!
ఈ నేపథ్యంలో స్పందించిన ఆ రాష్ట్ర హోంమంత్రి (Karnataka Home Minister) అరగ జ్ఞానేంద్ర.. ప్రభుత్వం సైతం దీనిపై పనిచేస్తోందని తెలిపారు. బిల్లు తీసుకొచ్చే అంశాన్ని పరిశీలిస్తున్నట్లు చెప్పారు. ఏదైనా ఆశ చూపి మత మార్పిడిని ప్రోత్సహించడం నేరమని అన్నారు.
"వైద్య సమస్యలు నయమవుతాయని చెబుతూ మత మారాలని సూచించడం నేరం. మత మార్పిడి వల్ల శాంతి దెబ్బతింటుంది. తెరవెనక వ్యవస్థీకృత నెట్వర్క్ నడుస్తోంది. చట్టపరమైన చర్యలు తీసుకునే అంశంపై మేం చర్చిస్తున్నాం."
-అరగ జ్ఞానేంద్ర, కర్ణాటక హోంమంత్రి
ఇటీవల అనేక భాజపా పాలిత రాష్ట్రాలు బలవంతపు మత మార్పిడులకు వ్యతిరేకంగా చట్టాలను తీసుకొచ్చాయి. ప్రేమ, పెళ్లి పేరిట హిందు మహిళలను బలవంతంగా ఇతర మతాల్లోకి మారేలా చేస్తున్నారని, వాటిని అరికట్టేందుకు ఈ చట్టాలు ఉపయోగపడతాయని ఆయా రాష్ట్ర ప్రభుత్వాలు చెబుతున్నాయి.
ఇదీ చదవండి: ఆగని అత్యాచారాలు.. కదులుతున్న బస్సు, గుడిలో రేప్లు
