అది 2015 జనవరి. అమెరికా అధ్యక్షుడు బరాక్ ఒబామా భారత్లో పర్యటించిన సమయం. గణతంత్ర దినోత్సవానికి హాజరయ్యేందుకు వచ్చిన ఒబామాకు.. భారత్ ఘనమైన ఆతిథ్యం ఇచ్చింది. ఈ సందర్భంగా ప్రధానమంత్రి నరేంద్ర మోదీ ధరించిన సూట్.. ప్రపంచాన్ని ఆకర్షించింది. వార్తల్లో పతాకశీర్షికలకెక్కింది. వేలంలో కోట్ల రూపాయలు పలికింది. ప్రపంచంలోనే అత్యంత ఖరీదైన సూట్గా నిలిచింది.
ఈ సూట్ ధర రూ.11 లక్షలు కాగా.. మోదీపై అభిమానంతో సూరత్కు చెందిన వజ్రాల వ్యాపారి లాల్జీ పటేల్ దాన్ని రూ.4.31 కోట్లకు కొనుగోలు చేశారు. ఫిబ్రవరి 20న జరిగిన వేలంలో మోదీ సూట్ను సొంతం చేసుకున్నారు.
ఎక్కడుందంటే?
ప్రస్తుతం వ్యాపారి కొనుగోలు చేసిన మోదీ సూట్.. ఓ ఫ్యాక్టరీలో ఉంది. ఫ్యాక్టరీ అంటే ఏదో సాధారణమైన పరిస్థితుల్లో మోదీ సూట్ను ఉంచారని అనుకుంటే పొరపడినట్లే. చాలా జాగ్రత్తగా సూట్ను సంరక్షిస్తున్నారు. అత్యంత సురక్షితమైన, అత్యాధునిక సాంకేతికత ఉన్న బుల్లెట్ ప్రూఫ్ బాక్స్లో సూట్ను ఉంచారు. కనీసం గాలి కూడా ఈ బాక్స్లోకి దూరదు. సూట్ను కొనుగోలు చేసిన తర్వాత దాన్ని సంరక్షించేందుకు ప్రత్యేక ఏర్పాట్లు చేసినట్లు లాల్జీభాయ్ పటేల్ ఈటీవీ భారత్తో చెప్పారు.
"నరేంద్ర భాయ్ సూట్ వేసిన ఈ విగ్రహం అహ్మదాబాద్కు చెందిన ఓ కళాకారుడు తయారు చేశారు. ఒబామా వచ్చినప్పుడు తీసిన ఫొటోల్లో మోదీ ఎలా ఉన్నారో అదే విధంగా దీన్ని రూపొందించాం. సూట్ను చాలా జాగ్రత్తగా సంరక్షిస్తున్నాం. బుల్లెట్ ప్రూఫ్ బాక్స్ తయారు చేశాం. కేంద్ర మంత్రులు, రాష్ట్ర మంత్రులు ఎవరు వచ్చినా.. ఇక్కడ ఫొటోలు దిగి సంతోషం వ్యక్తం చేస్తారు. అది మాకూ ఆనందాన్ని ఇస్తుంది."
-లాల్జీభాయ్ పటేల్, వజ్రాల వ్యాపారి
మోదీ సూట్ను సంవత్సరానికి రెండు సార్లు శుభ్రం చేస్తారు. తన ఇంట్లోని పనివారే జాగ్రత్తగా ఈ పని చేస్తారని లాల్జీ పటేల్ తెలిపారు.
గిన్నిస్ రికార్డు సాధించిన ఈ సూట్ అప్పట్లో వివాదాస్పదమైంది. ఖరీదైన సూట్లు ధరించే మోదీ.. పేదల గురించి ఇంకేం ఆలోచిస్తారని విపక్షాలు విరుచుకుపడ్డాయి.
ఇదీ చదవండి: 'విభజన విషాద సంస్మరణ దినంగా ఆగస్టు 14'
