కరోనా బాధిత భర్త వీర్యం కోసం గుజరాత్ హైకోర్టును ఆశ్రయించిన మహిళ ఇంట విషాదం నెలకొంది. కోర్టు ఆదేశాలతో వీర్యం సేకరించిన ఒక్కరోజు తర్వాత.. ఆమె భర్త కన్నుమూశాడు. ఈమేరకు సదరు మహిళ తరఫు న్యాయవాది నీలాయ్ పటేల్ శుక్రవారం తెలిపారు.
"మంగళవారం.. కోర్టు అనుమతులిచ్చిన కొద్దిసేపటి తర్వాత తాము మహిళ భర్త నుంచి వీర్యాన్ని సేకరించామని ఆస్పత్రి వర్గాలు మాకు సమాచారాన్ని అందించాయి. అయితే.. గురువారం అతడు మృతి చెందాడు. ఈ కేసులో తదుపరి విచారణ శుక్రవారం జరగాల్సి ఉంది."
-నీలాయ్ పటేల్, న్యాయవాది
అసలేంటీ కేసు?
వడోదరాలోని స్టెర్లింగ్ ఆస్పత్రిలో కొవిడ్తో చికిత్స పొందుతున్న తన భర్త నుంచి సేకరించిన వీర్యం ద్వారా ఐవీఎఫ్ విధానంలో తల్లి కావాలని ఓ మహిళ ఆశించింది. అయితే.. అందుకు ఆస్పత్రి వైద్యులు నిరాకరించారు. కోర్టు అనుమతులిస్తేనే తాము వీర్యాన్ని సేకరిస్తామని చెప్పారు. దీంతో గుజరాత్ హైకోర్టులో ఆ మహిళ పిటిషన్ దాఖలు చేసింది.
ఈ పిటిషన్పై మంగళవారం విచారణ న్యాయస్థానం.. సదరు కొవిడ్ బాధితుని నుంచి వీర్యాన్ని తక్షణమే సేకరించాలని ఆస్పత్రిని నిర్దేశించింది. తదుపరి ఆదేశాలు ఇచ్చే వరకు దాన్ని తగిన విధంగా భద్రపరచాలని సూచించింది.
'ఆ రోజే సేకరించారు..'
కోర్టు ఆదేశించిన తర్వాత మంగళవారమే ఆ వ్యక్తి వీర్యాన్ని వైద్యులు సేకరించారని స్టెర్లింగ్ ఆస్పత్రి జోనల్ డైరెక్టర్ అనిల్ నంబియార్ బుధవారం తెలిపారు. కోర్టు అనుమతి ఇస్తే.. ఐవీఎఫ్ విధానం కోసం దాన్ని వినియోగిస్తామని చెప్పారు.
ఇదీ చూడండి: ఆ 256 మంది చిరు వ్యాపారులు.. 'పేద' కోటీశ్వరులు!
ఇదీ చూడండి: అత్యంత ఖరీదైన బర్త్డే పార్టీలు ఇవే!
