సాగు చట్టాలకు వ్యతిరేకంగా దిల్లీ సరిహద్దుల్లో రైతులు ఉద్రిక్తంగా ఆందోళన కొనసాగిస్తున్న నేపథ్యంలో కేంద్రంపై విమర్శలు గుప్పించారు నేషనలిస్ట్ కాంగ్రెస్ పార్టీ(ఎన్సీపీ) అధినేత శరద్ పవార్. రాష్ట్రాలను సంప్రదించకుండా మూడు వ్యవసాయ చట్టాలను తీసుకొచ్చారని.. అందువల్లే ఈ సమస్యలు తలెత్తాయని ఆరోపించారు. గ్రామాల్లో వ్యవసాయం చేసుకోవాల్సిన రైతులను దిల్లీలో కూర్చోబెట్టడం తగదని వ్యాఖ్యానించారు. దీని వల్ల వ్యవసాయ పనులు ఆగిపోతాయన్నారు.
దిల్లీ సరిహద్దుల్లో నెలరోజులకు పైగా రైతులు ఆందోళనలు కొనసాగిస్తున్నారు. ఇప్పటివరకు ఐదుసార్లు చర్చలు జరిపినా ఫలితం లేదు. ఈ క్రమంలో రైతు సంఘాలతో చర్చలు జరుపుతున్న మంత్రుల బృందానికి పవార్ ప్రశ్నలు సంధించారు. అధికార పార్టీ.. వ్యవసాయం, రైతుల సమస్యలపై లోతైన అవగాహనతో చర్చలు జరపాలని హితవు పిలికారు.
ఈసారి విఫలమైతే..
ప్రధాని నరేంద్ర మోదీ.. అన్నదాతల ఆందోళనలపై ప్రతిపక్షాలను తప్పుబట్టడం మానేసి.. నిరసనలను తీవ్రంగా పరిగణించాల్సిన అవసరం ఉందన్నారు పవార్. రైతు సంఘాలతో కేంద్రం మరోసారి జరపనున్న చర్చలు విఫలమైతే.. 40 కర్షక సంఘాల ప్రతినిధులతో భేటీ అవుతామని హెచ్చరించారు.
'ఈ విధంగా కాదు'
'మన్మోహన్ సింగ్ నేతృత్వంలోని యూపీఏ ప్రభుత్వం వ్యవసాయ రంగంలో సంస్కరణలు చేయాలనుకుంది. అయితే ఈ విధంగా కాదు' అని కేంద్రమంత్రి నరేంద్ర సింగ్ చేసిన వ్యాఖ్యలపై స్పందించారు పవార్. ప్రస్తుత పరిస్థితులను అర్థం చేసుకుని రాష్ట్ర ప్రభుత్వాలు, ఆ రంగంలోని నిపుణులతో చర్చించి అన్ని సమస్యలను పరిష్కరిస్తూ సంస్కరణలు చేపట్టాలన్నారు. అయితే ఇవేమి లేకుండా సొంత మెజారిటీతో చట్టాలు తీసుకొచ్చారని.. దీంతో సమస్యలు మొదలయ్యాయన్నారు.
ఇదీ చూడండి: 'ఠాగూర్ గడ్డపై మత రాజకీయాలు సాగవు'
