ఉత్తరాఖండ్‌లోని ఛమోలీ జిల్లా నీతీ లోయకు సమీపంలో శుక్రవారం మంచు పెళ్లలు విరిగిపడ్డాయి. దట్టంగా మంచు కురుస్తుండటంతో ఆ ప్రాంతం నుంచి ఎలాంటి సమాచారం అందలేదని సరిహద్దు రహదారుల సంస్థ (బీఆర్ఓ) తెలిపింది. తమ కార్మికులు అక్కడ రోడ్డు నిర్మాణ పనిచేస్తున్నట్లు సంబంధిత అధికారి ఒకరు తెలిపారు.
ఓ బృందం అక్కడికి చేరుకున్నప్పటికీ నష్టానికి సంబంధించిన సమాచారమేదీ లేదని తెలిపారు. ఈ ఘటనపై అందరినీ అప్రమత్తం చేసినట్లు ముఖ్యమంత్రి తీరథ్‌ సింగ్‌ రావత్‌ ట్విటర్‌లో తెలిపారు. ఈ ఏడాది ఫిబ్రవరిలో ఛమోలీలోనే భారీగా మంచుపెళ్లలు విరిగిపడిన ఘోర విపత్తులో దాదాపు 80 మంది ప్రాణాలు కోల్పోయిన సంగతి తెలిసిందే.
నీతి వ్యాలీలో మూడు రోజులుగా హిమపాతం భారీగా పడుతోంది. దీంతో జోషిమఠ్-మలారి రహదారి మంచులో కూరుకుపోయింది. ఆర్మీ, ఐటీబీపీ వాహనాల రాకపోకలకు అంతరాయం ఏర్పడింది.
ఇదీ చూడండి: 8 రోజుల్లోనే వంతెన పునర్నిర్మించి బీఆర్ఓ రికార్డ్
