కర్ణాటక గడగ్లో జరిగిన ఘోర అగ్నిప్రమాదం భారీ ఆస్తి నష్టాన్ని, అనేక కుటుంబాలకు తీవ్ర నిరాశను మిగిల్చింది. గడగ్-హుబ్బళ్లి రోడ్లోని ద్విచక్రవాహనాల షోరూంలోని 40కిపైగా కొత్త రాయల్ ఎన్ఫీల్డ్ బైక్లు పూర్తిగా కాలిపోయాయి. ఉగాది రోజున కొత్త బైక్ ఇంటికి తీసుకెళ్దామన్న ఆశతో దాదాపు 30 మంది కొత్త బైక్లు ఆర్డర్ చేశారు. వారందరికీ డెలివరీ ఇచ్చేందుకు వీలుగా స్టాక్ తెప్పించారు షోరూం యజమాని వీరేశ్ గుగ్గరి. కొద్దిగంటలైతే అంతా సవ్యంగా సాగేది. 30 కుటుంబాలు కొత్త బైక్ కొన్న సంతోషంతో పండుగను ఘనంగా జరుపుకునేవి.
అయితే శుక్రవారం అర్ధరాత్రి సమయంలో బైక్ షోరూంలో మంటలు చెలరేగాయి. క్షణాల్లోనే వ్యాపించాయి. ఫలితంగా 40కిపైగా రాయల్ ఎన్ఫీల్డ్ బైక్లు దగ్ధమయ్యాయి. ప్రమాదం గురించి సమాచారం అందిన వెంటనే అగ్నిమాపక సిబ్బంది రంగంలోకి దిగారు. రెండు ఫైరింజిన్లతో రెండు గంటలు కష్టపడి మంటలు ఆర్పారు. కానీ అప్పటికే భారీ నష్టం జరిగిపోయింది.
