దేశవ్యాప్తంగా 'కిసాన్ షహీద్​ యాత్ర'కు రైతుల పిలుపు

సాగు చట్టాలపై జరిపిన పోరులో అమరులైన రైతులకు గౌరవసూచకంగా దేశవ్యాప్తంగా 'కిసాన్ షహీద్​ యాత్ర' నిర్వహించాలని కర్షక సంఘాలు పిలుపునిచ్చాయి. కన్యాకుమారి నుంచి దిల్లీ వరకు ర్యాలీ జరుపుతామని వెల్లడించాయి.

సాగు చట్టాలపై జరుగుతున్న ఉద్యమాన్ని ఉద్ధృతం చేయాలని రైతు సంఘాల నేతలు నిర్ణయించారు. దేశవ్యాప్తంగా 'కిసాన్​ షహీద్​ యాత్ర' నిర్వహించాలని సంకల్పించారు. కన్యాకుమారి నుంచి దిల్లీ వరకు యాత్ర చేయడానికి పూనుకున్నారు. యాత్రలో అమరులైన రైతుల అస్థికలు సేకరించనున్నారు. ఈ మేరకు రైతు సంఘాల నేతలు జరిపిన సమావేశంలో నిర్ణయం తీసుకున్నారు.

సాగు చట్టాలకు వ్యతిరేకంగా సింఘు సరిహద్దు వద్ద గత నాలుగున్నర నెలల నుంచి రైతులు ఉద్యమిస్తున్నారు. ఇప్పటికే ఎన్నోసార్లు రాస్తారోకోలు, ధర్నాలు, బంద్​లు నిర్వహించారు. కానీ ఇవేవి కేంద్రాన్ని కదిలించలేకపోయాయి. ఈ నేపథ్యంలో తాజా నిర్ణయం ప్రాధాన్యం సంతరించుకుంది.

''ఇప్పటివరకు 351 మంది రైతులు అమరులయ్యారు. రైతులందరం ఏకమై కిసాన్ షహీద్ యాత్రను నిర్వహించనున్నాం. ప్రభుత్వం అనుమతి ఇచ్చినా, ఇవ్వకున్నా ర్యాలీ నిర్వహించి తీరుతాం.''

- భోపాల్​ సింగ్​ చౌధరి, భారతీయ కిసాన్​ యూనియన్ ప్రతినిధి​

యాత్రలో దాదాపు 1500 మంది రైతులు పాల్గొననున్నట్లు సమాచారం.

ఇదీ చదవండి: ఎరువుల ధరాఘాతం.. రైతులపై పిడుగు