పట్టు వీడని రైతన్న- రేపు కేంద్రంతో మరోసారి భేటీ

రైతులతో కేంద్రం మంగళవారం జరిపిన చర్చలు అసంపూర్ణంగా ముగిశాయి. రైతు సంఘాల ప్రతినిధులు, కేంద్ర ప్రభుత్వ అధికారులతో కమిటీ ఏర్పాటు చేద్దామని మంత్రులు ప్రతిపాదించగా రైతు సంఘాలు తిరస్కరించాయి. ఈనెల 3న మరోసారి భేటీ కావాలని నిర్ణయించారు. అప్పటి వరకూ ఆందోళన కొనసాగుతుందని రైతులు స్పష్టం చేశారు. తమ సమస్యలపై ముసాయిదాను కేంద్రానికి బుధవారం సమర్పిస్తామని పేర్కొన్నారు.

వ్యవసాయ చట్టాలకు వ్యతిరేకంగా ఆందోళనలు చేస్తున్న రైతు సంఘాల ప్రతినిధులతో కేంద్రం మంగళవారం జరిపిన చర్చలు ఓ కొలిక్కి రాకుండానే ముగిశాయి. సాగు చట్టాలను కేంద్రం ఉపసంహరించుకోవాల్సిందేనని రైతులు డిమాండ్ చేస్తున్నారు. ఈ విషయంలో వెనక్కి తగ్గే ప్రసక్తే లేదని తేల్చి చెప్పారు. రెండున్నర గంటలకుపైగా సాగిన భేటీలో కేంద్ర ప్రభుత్వ అధికారులతో కమిటీ ఏర్పాటు చేద్దామని మంత్రులు చేసిన ప్రతిపాదనను రైతులు తిరస్కరించారు. ఈనెల 3న మరోసారి భేటీ కావాలని నిర్ణయించారు. అప్పటివరకూ ఆందోళన కొనసాగుతుందని రైతులు స్పష్టం చేశారు.

వ్యవసాయ చట్టాల అంశంలో తమకు ఉన్న సమస్యలపై ముసాయిదాను బుధవారం సమర్పిస్తామని రైతు సంఘాలు తెలిపాయి. తర్వాతి సమావేశం జరిగేవరకు తాము లేవనెత్తిన సమస్యలపై ఆలోచించడానికి ప్రభుత్వానికి సమయం ఉందని స్పష్టం చేశాయి.

రైతుల సంక్షేమం కోసం ప్రభుత్వం పూర్తిగా కట్టుబడి ఉందని, వ్యవసాయ అభివృద్ధికి కేంద్రం అధిక ప్రాధాన్యత ఇస్తుందని ఆ శాఖ మంత్రి నరేంద్ర సింగ్ తోమర్ తెలిపారు. గురువారం జరిగే భేటీలో రైతుల చట్టాలకు సంబంధించిన సమస్యలన్నింటిపైనా చర్చిస్తామని పేర్కొన్నారు.

సరిహద్దులు మూసివేత..

కేంద్రంతో జరిపిన చర్చలు విఫలమైనందున దిల్లీ సరిహద్దుల్లో రైతులు ఏడో రోజూ ఆందోళన కొనసాగిస్తున్నారు. ఎముకలు కొరికే చలిలోనూ వారు పట్టుదలగా నిరసన వ్యక్తం చేస్తున్నారు. ఈ ఆందోళనల కారణంగా దిల్లీకి వెళ్లే పలు మార్గాల్లో వాహన రాకపోకలకు వీల్లేకుండా పోయింది. దిల్లీ-నోయిడా సరిహద్దుల వద్ద భారీగా పోలీసు బలగాలను మోహరించారు. బయటి రాష్ట్రాల నుంచి రైతులు రాకుండా ఇప్పటికే సింఘూ, టిక్రీ సహా మూడు మార్గాలను మూసివేసిన పోలీసులు తాజాగా గుడ్‌గావ్‌, ఝజ్జర్‌-బహదూర్‌గఢ్‌ మార్గాలను కూడా మూసివేశారు. ఈ కారణంగా దిల్లీలో పలుచోట్ల తీవ్రమైన ట్రాఫిక్‌ సమస్యలు తలెత్తుతున్నాయి.

పెరుగుతున్న మద్దతు..

దిల్లీలో ఆందోళనలు చేపట్టిన రైతులకు మద్దతు క్రమంగా పెరుగుతోంది. అన్నదాతలకు అండంగా ఉంటామని సామాజిక ఉద్యమకారుడు అన్నాహజారేతో పాటు కాంగ్రెస్‌ అగ్రనేత రాహుల్‌ గాంధీ స్పష్టం చేశారు. రైతులపై లాఠీలు, జలఫిరంగులు, బాష్ప వాయు గోళాలను ప్రయోగించడం ద్వారా వారి రుణం తీర్చుకోగలమా అని రాహుల్‌ ప్రశ్నించారు. ప్రభుత్వం అహంకార పీఠాన్ని దిగొచ్చి వారి హక్కులను కాపాడాలని డిమాండ్‌ చేశారు.

రైతు ఉద్యమానికి సంపూర్ణ మద్దతు ప్రకటిస్తున్నట్లు అన్నా హజారే తెలిపారు. ఎన్నికల్లప్పుడు రైతుల దగ్గరకు వెళ్లి ఓట్లడుగుతారన్న ఆయన.. ఇప్పుడు వారు పెద్ద ఎత్తున ఆందోళనలు చేస్తుంటే వెళ్లి చర్చలు జరపొచ్చు కదా? అని ప్రశ్నించారు.

రైతుల గోడు విని వారి సమస్యకు పరిష్కారం చూపాలని కేరళ ముఖ్యమంత్రి పినరయ్‌ విజయన్‌ కోరారు. కొత్త వ్యవసాయ చట్టాలతో రైతుల భూములను కేంద్రం ఆక్రమించే కుట్ర చేస్తోందని సమాజ్‌వాదీ పార్టీ అధ్యక్షుడు అఖిలేష్‌ యాదవ్‌ ఆరోపించారు. పంటలకు కనీస మద్దతు ధర కొనసాగుతుందని పదేపదే చెబుతున్న ప్రధాని మోదీ.. అదే విషయాన్ని లిఖిత పూర్వకంగా హామీ ఇవ్వటానికి సమస్యేంటని జన్‌ నాయక్‌ జనతా పార్టీ ఎంపీ అజయ్‌ సింగ్‌ చౌతాలా ప్రశ్నించారు.