రైతుల ఆందోళన షహీన్బాగ్ తరహా కాదనన్నారు భారతీయ కిసాన్ యూనియన్ (బీకేయూ) నేత రాకేశ్ టికాయిత్. సాగు చట్టాలను రద్దుచేసే వరకు ఇంటికి తిరిగివెళ్లే ప్రసక్తే లేదని మరోమారు తేల్చిచెప్పారు. ఉత్తర్ప్రదేశ్లోని గాజియాబాద్లో కుండ్లీ-మానేసర్ ఎక్స్ప్రెస్ వేను 24 గంటలపాటు దిగ్బంధించిన సందర్భంగా ఈటీవీ భారత్తో ఆయన ఈ వ్యాఖ్యలు చేశారు.
ఇంటికి వెళ్లేది లేదు..
"రాజస్థాన్లో నాపై దాడి చేయించింది భాజపానే. రైతుల ఉద్యమాన్ని షహీన్బాగ్లా నీరుగార్చాలని అనుకుంటున్నారు. కొవిడ్ను సాకుగా చూపుతున్నారు. కానీ మా పోరాటం షహీన్బాగ్ తరహాలా కాదు. సాగు చట్టాలను రద్దుచేసే వరకు ఇంటికి వెళ్లేది లేదు."--- రాకేశ్ టికాయిత్, బీకేయూ నేత
సీఏఏకు వ్యతిరేకంగా దిల్లీ షహీన్బాగ్లో తీవ్ర స్థాయిలో ఆందళనలు చెలరేగాయి. కానీ గతేడాది మార్చి చివర్లో.. కరోనా విజృంభణ నేపథ్యంలో ఆ ప్రాంతం ఖాళీ అయిపోయింది.
కొవిడ్ నిబంధనలను పాటించకపోవడంపై..
"బంగాల్లో ఎవరు మాస్కులు ధరిస్తున్నారు? ఎన్నికలు జరిగే రాష్ట్రాలు, మిగిలిన రాష్ట్రాల జాబితాను వేరుగా విడుదల చేస్తే అప్పుడు తెలుస్తుంది. మే 2న ఫలితాల తర్వాత కొవిడ్ కేసులు విపరీతంగా పెరుగుతాయి." ---రాకేశ్ టికాయిత్, బీకేయూ నేత
పెద్ద కార్పొరేట్ సంస్థలు అన్నదాతలను లూటీ చేస్తున్నాయని టికాయిత్ విమర్శించారు. ప్రభుత్వం రైతుల డిమాండ్లను తప్పక అంగీకరిస్తుందని పేర్కొన్నారు.
ఖట్టర్ను అడ్డుకుంటాం..
ఈ నెల 14న బదౌలీ గ్రామంలో అంబేడ్కర్ విగ్రహావిష్కరణకు రానున్న హరియాణా సీఎం మనోహర్ లాల్ అడ్డుకుంటామని టికాయిత్ హెచ్చరించారు. రైతుల ఐక్యతను దెబ్బతీసేందుకే ఖట్టర్ వస్తున్నారని ఆయన ఆరోపించారు. అంబేడ్కర్కు తాము వ్యతిరేకం కాదని, మరెవరైనా విగ్రహావిష్కరణ చేయొచ్చని చెప్పారు.
ఇదీ చూడండి: త్రివర్ణాలతో రైతుల వెదురు గుడిసెలు
