భారతీయ కిసాన్ యూనియన్ నేత రాకేశ్ టికాయిత్ను హత్య చేస్తానంటూ ఓ దుండగుడు బెదిరింపులకు పాల్పడ్డాడు. ఈ విషయాన్ని నేరుగా పోలీస్ కంట్రోల్ రూమ్కి ఫోన్ చేసి చెప్పడం గమనార్హం. ఈ ఘటన దిల్లీలోని కమలా మార్కెట్ పోలీస్ స్టేషన్ పరిధిలో శుక్రవారం రాత్రి జరిగింది.
ఇదీ జరిగింది..
కమలా మార్కెట్ ప్రాంతంలో టీ అమ్ముకొని నివసించే నిందితుడు శుక్రవారం రాత్రి పోలీసులకు ఫోన్ చేశాడు. రైతు నేత రాకేశ్ టికాయిత్ను చంపేస్తానంటూ వ్యాఖ్యలు చేశాడు. దీంతో అప్రమత్తం అయిన పోలీసులు కాల్ను ట్రాక్ చేయగా.. అతను కమలా మార్కెట్ ప్రాంతం నుంచి మాట్లాడుతున్నాడని గుర్తించారు. వెంటనే ఆ ప్రాంత పోలీసులకు సమాచారం ఇవ్వగా నిందితుడిని అదుపులోకి తీసుకున్నారు.
మత్తులో..
నిందితుడిని దర్యాప్తు చేసిన పోలీసులు.. అతను విపరీతంగా మద్యం సేవించాడని తెలిపారు. తాగిన మత్తులో అతను ఈ వ్యాఖ్యలు చేశాడని.. వాస్తవానికి అతనికి హత్య చేయాలన్న ఉద్దేశం లేదని పేర్కొన్నారు. అనంతరం నిందితుడిని వదిలేశారు.
ఇదీ చదవండి : అక్రమంగా తరలిస్తున్న 15కిలోల బంగారం పట్టివేత
