Fake ncb officers: మహారాష్ట్రలో దారుణ ఘటన వెలుగు చూసింది.. తాము నార్కొటిక్స్ కంట్రోల్ బ్యూరో(ఎన్సీబీ) అధికారులమంటూ ఇద్దరు దుండగులు భయభ్రాంతులకు గురిచేయగా ఓ నటి ఆత్మహత్యకు పాల్పడింది. ఈ కేసులో నిందితులను పోలీసులు అరెస్టు చేశారు.
అసలేం జరిగింది?
Mumbai actress suicide: ముంబయికి చెందిన ఓ నటి(28) తన స్నేహితులతో కలిసి డిసెంబరు 20న ఓ ఫైవ్ స్టార్ హోటల్లో పార్టీకి వెళ్లింది. అక్కడకు ఇద్దరు నకిలీ ఎన్సీబీ అధికారులు వచ్చి, డ్రగ్స్ కేసులో పేరు వెల్లడించకుండా ఉండాలంటే.. రూ.20 లక్షలు ఇవ్వాలని ఆమెను డిమాండ్ చేశారు. డబ్బుల కోసం నిందితులు.. ఆమెకు పదేపదే ఫోన్ చేసి విసిగించారు. దీంతో మనస్తాపం చెందిన ఆమె తన గదిలోని ఫ్యాన్కు ఉరివేసుకుని గురువారం ఆత్మహత్యకు పాల్పడింది.
దీనిపై కేసు నమోదు చేసుకున్న పోలీసులు దర్యాప్తు చేపట్టారు. శుక్రవారం నిందితులు సూరజ్ మోహన్ పరదేశి(38), పర్వీన్ రఘునాథ్ వాలింబే(35)ను ఠాణెలో అరెస్టు చేశారు. వారిపై సంబంధిత సెక్షన్ల కింద కేసు నమోదు చేశారు.
'ఎన్సీబీనే చేసింది'
Nawab malik on ncb: నటి ఆత్మహత్య నేపథ్యంలో ఎన్సీబీపై మహారాష్ట్ర మైనారిటీ వ్యవహారాల శాఖ మంత్రి నవాబ్ మాలిక్ మరోసారి సంచలన ఆరోపణలు చేశారు. ఎన్సీబీనే తమ ప్రైవేట్ ఆర్మీతో డబ్బుల కోసం మహిళను వేధించిందని చెప్పారు.
"బాలీవుడ్ నటీమణుల నుంచి డబ్బు వసూలు చేసేందుకు ఎన్సీబీనే ఓ ప్రైవేట్ ఆర్మీని ఏర్పాటు చేసింది. ఫేక్ కేసుల పేరుతో వారిని బెదిరించి, డబ్బులను గుంజుతోంది."
-నవాబ్ మాలిక్, మహారాష్ట్ర మంత్రి.
ఎన్సీబీ ప్రైవేట్ ఆర్మీ వేధింపులను తట్టుకోలేకపోవడం వల్లే సదరు నటి బలవన్మరణానికి పాల్పడిందని మాలిక్ చెప్పారు.
ఇదీ చూడండి: గ్యాస్ ట్యాంకర్ బోల్తాపడి పేలుడు- 2కి.మీ మేర వ్యాపించిన మంటలు
ఇదీ చూడండి: 14 ఏళ్ల బాలికపై గ్యాంగ్ రేప్- 9 మంది అరెస్ట్!
