Enforcement Directorate Xiaomi: చైనాకు చెందిన దిగ్గజ మొబైల్ ఉత్పత్తుల సంస్థ షియోమీకి భారత్‌లో గట్టి షాక్ తగిలింది. ఫెమా(విదేశీ మారక చట్టం) నిబంధనల ఉల్లంఘనల కింద షియోమీ టెక్నాలజీ ఇండియా ప్రైవేటు లిమిటెడ్‌కు చెందిన బ్యాంకు ఖాతాల్లోని రూ.5551.27కోట్ల డిపాజిట్లను ఎన్‌ఫోర్స్‌మెంట్‌ డైరెక్టరేట్‌ అధికారులు జప్తు చేశారు. ఈ మేరకు ఈడీ శనివారం వెల్లడించింది. చైనాకు చెందిన షియోమీ గ్రూప్‌ అనుబంధ సంస్థ అయిన షియోమీ ఇండియా భారత్‌లో 2014 నుంచి కార్యకలాపాలు సాగిస్తోంది. అయితే ఆ మరుసటి ఏడాది నుంచే ఈ కంపెనీ అక్రమంగా నిధులను ఇతర దేశాలకు తరలిస్తున్నట్లు ఆరోపణలు వచ్చాయి. దీనిపై ఈ ఏడాది ఫిబ్రవరిలో కేసు నమోదు చేసిన ఈడీ దర్యాప్తు చేపట్టింది.
''ఈ కంపెనీ గత కొన్నేళ్లుగా రూ.5551.27 కోట్ల సమానమైన విదేశీ నిధులను మూడు విదేశాల్లో పనిచేస్తున్న మూడు సంస్థలకు అక్రమంగా పంపించింది. షియోమీ గ్రూప్‌తో పాటు అమెరికాలో ఉన్న మరో రెండు సంస్థలకు ఈ నిధులు చేరాయి. మాతృక సంస్థ ఆదేశాలతోనే రాయల్టీల రూపంలో ఈ భారీ మొత్తాన్ని బదిలీ చేసింది. సదరు సంస్థల నుంచి ఎలాంటి సేవలను పొందకుండానే ఈ నగదును పంపించింది. ఇది ఫెమా చట్ట నిబంధనలకు విరుద్ధం. అంతేగాక, బ్యాంకులను తప్పుదోవ పట్టించి ఈ నిధులను విదేశాలకు చేరవేసింది.'' అని ఈడీ ఓ ప్రకటనలో వెల్లడించింది. ఈ కేసు విచారణలో భాగంగానే షియోమీ ఇండియా గ్గోబల్ వైస్‌ ప్రెసిడెంట్‌ మను కుమార్‌ జైన్ను ఈడీ ఇటీవల ప్రశ్నించింది.
ఇదీ చూడండి : పాటియాలాలో టెన్షన్ టెన్షన్.. ఇంటర్నెట్ సేవలు బంద్
