బిహార్ ఫలితాలు కాంగ్రెస్‌ను కుంగదీశాయి. పార్టీ శ్రేణులను పూర్తిగా నైరాశ్యంలోకి నెట్టాయి. బిహార్ ప్రభావం.. కాంగ్రెస్‌పై అన్ని విధాలుగా ఉండనుంది. ఈ పరిణామాలు.. వచ్చే ఏడాది జరగనున్న తమిళనాడు ఎన్నికల్లోనూ పార్టీని ప్రభావితం చేయనున్నాయి. మహాకూటమిలో భాగంగా నిరాశ కలిగించే ఫలితాలు సాధించి.. కూటమికి అధికారం దూరం కావటానికి కారణమైందన్న వాదనల మధ్య.. డీఎంకే పొత్తు-స్థానాల కేటాయింపుపై పునరాలోచన చేసే అవకాశం కనిపిస్తోంది. ఈ నేపథ్యంలో కాంగ్రెస్ ముందుగానే పావులు కదుపుతోంది. ఎట్టిపరిస్థితుల్లోనూ తమిళనాడు అసెంబ్లీ ఎన్నికల్లో గట్టిపోటీ ఇవ్వాలని యోచిస్తోంది. సీట్ల పంపకం విషయంలో అప్పుడే చర్చలు మొదలుపెట్టింది.
రాష్ట్ర కాంగ్రెస్ చీఫ్ కేఎస్ అళగిరి, తమిళనాడు కాంగ్రెస్ పార్టీ బాధ్యుడు దినేశ్ గుండురావ్ సహా సీనియర్ నేతలు ద్రవిడ మున్నేట్ర కళగం(డీఎంకే) అధినేత ఎమ్కే స్టాలిన్తో భేటీ అయ్యారు.
ఇరు పార్టీల నేతలు రానున్న అసెంబ్లీ ఎన్నికల్లో సీట్ల పంపకంపై చర్చలు జరిపినట్లు కాంగ్రెస్ పార్టీ వర్గాల సమాచారం. అయితే పార్టీ వీటిని కొట్టిపారేసింది.
"అసెంబ్లీ ఎన్నికల్లో సీట్ల పంపకంపై ఈ రోజు ఎలాంటి చర్చ జరగలేదు. డీఎంకే నేతలను రాహుల్ గాంధీ ఎన్నికల ప్రచారానికి హాజరు కావాలని ఆహ్వానించేందుకే వచ్చాం. రాహుల్ గాంధీ ఎన్నికల ప్రచార తేదీలు ఇంకా కొలిక్కిరాలేదు. మిత్రపక్షాలు ఎన్నికల ప్రచారం గురించి చర్చించాం. పార్టీకి పట్టున్న స్థానాలను గుర్తించే పనిలో ఉన్నాం."
- కేఎస్ అళగిరి, తమిళనాడు కాంగ్రెస్ చీఫ్
రాష్ట్ర శాసనసభ ఎన్నికల గురించి కాంగ్రెస్ అగ్రనేత రాహుల్ గాంధీ పార్టీ సీనియర్ నాయకులతో మంగళవారం చర్చించారు. సీట్ల పంపకం విషయంలో డీఎంకేపై ఎలాంటి ఒత్తిడి తీసుకురాబోమని అళగిరి ఇప్పటికే స్పష్టం చేశారు. అయితే చెప్పుకోదగ్గ స్థానాల్లో మాత్రం పోటీ చేస్తామన్నారు. గత 15 ఏళ్లుగా ఈ రెండు పార్టీలు పొత్తుతోనే బరిలోకి దిగుతున్నాయి.
వరుస పరాజయాలు..
ఒకప్పుడు రాష్ట్రాన్ని పాలించిన కాంగ్రెస్ పార్టీ పరిస్థితి ఇప్పుడు దయనీయంగా ఉంది. 2011లో 63 సీట్లలో పోటీ చేసిన కాంగ్రెస్ 2016 ఎన్నికల్లో 41 సీట్లలోనే బరిలోకి దిగింది. అందులో కేవలం 8 స్థానాల్లోనే విజయం సాధించింది.
2019 లోక్సభ ఎన్నికల తర్వాత జరిగిన పలు రాష్ట్రాల ఎన్నికల్లో కాంగ్రెస్ ఓటమి పాలయింది. ఇటీవల జరిగిన బిహార్ ఎన్నికలతో కాంగ్రెస్ పరిస్థితి మరింత ఘోరంగా తయారైంది.
కాంగ్రెస్ నాయకత్వలేమితో ఇబ్బంది పడుతోందని రాజకీయ విశ్లేషకులు అంటున్నారు. ప్రస్తుతం కాంగ్రెస్తో పొత్తు పెట్టుకోవడానికి కూడా ప్రాంతీయ పార్టీలు ఆలోచించే పరిస్థితి తలెత్తింది. ఇదే సరైన సమయంగా భావిస్తోన్న కమలనాథులు వివిధ రాష్ట్రాల్లో బలం పెంచుకునే ప్రయత్నం చేస్తున్నారు. ఈ పరిస్థితుల్లో తమిళనాడు ఎన్నికలు కాంగ్రెస్ పార్టీకి చావో రేవో అన్న విధంగా ఉన్నాయి.
- ఇదీ చూడండి: అక్కడ టీ తాగితే మాస్కు ఫ్రీ!
