వారిద్దరు మరుగుజ్జులు. ఏడు నెలల క్రితమే ఓ గుడిలో కులాంతర వివాహం చేసుకున్నారు. అయితే తాజాగా రెండోసారి మళ్లీ పెళ్లి చేసుకున్నారు. ఇప్పుడు మాత్రం రిజిస్టర్ ఆఫీస్లో చట్టపరంగా ఒక్కటయ్యారు. కేంద్ర ప్రభుత్వ సాయం కోసమే.. మరోసారి పెళ్లి చేసుకున్నట్లు ఆ దంపతులు తెలిపారు. బిహార్లోని సీతామడి జిల్లాలో ఈ సంఘటన జరిగింది.
ఇదీ అసలు కథ
25 ఏళ్ల యోగేంద్ర.. దుమ్రా బ్లాక్‌లోని రాంపుర్ పరోరి గ్రామానికి చెందిన వ్యక్తి. ఇతడి ఎత్తు 3 అడుగులు. దీంతో ఇతడిని పెళ్లి చేసుకోవడానికి ఎవరూ ముందుకు రాలేదు. ఈ క్రమంలోనే సీతామడి సిటీలోని లోహియా నగర్కు చెందిన 3.5 అడుగుల ఎత్తున్న పూజా(21) గురించి తెలిసింది. దీంతో ఆమె కుటుంబసభ్యులను సంప్రదించి.. 2022 నవంబర్లో ఆ యువతిని పెళ్లి చేసుకున్నాడు. సీతాదేవి స్వగ్రామమైన పునౌర ధామ్లో వీరిద్దరి పెళ్లి జరిగింది. అయితే, కులాంతర వివాహం చేసుకున్న వీరికి.. కేంద్ర ప్రభుత్వ ఆర్థిక సాయం అందుతుందని తెలుసుకున్నారు. అనంతరం ప్రభుత్వం అధికారులను సంప్రదించారు. ప్రభుత్వ సాయం పొందాలంటే చట్టపరంగా వివాహం చేసుకోవాలని అధికారులు వారికి సూచించారు. దీంతో స్థానిక రిజిస్ట్రర్ ఆఫీస్లో వీరిద్దరు మరోసారి ఒక్కటయ్యారు.
"కులాంతర వివాహ పథకం కింద మాకు రూ. 2.5 లక్షల సాయం అందుతుంది. దాంతో పాటు దివ్యాంగుల సాయం కింద మరో లక్ష రూపాయలు సైతం అందుతాయి. అయితే మేము గుడిలో పెళ్లి చేసుకున్న కారణంగా.. ప్రభుత్వం నుంచి రావాల్సిన సాయం అందలేదు. అందుకే జూన్ 5న స్థానిక రిజిస్టర్ ఆఫీస్లో చట్టపరంగా మరోసారి పెళ్లి చేసుకున్నాం." అని యోగేంద్ర తెలిపాడు. మళ్లీ పెళ్లి చేసుకోవడం చాలా ఆనందంగా ఉందని యోగేంద్ర భార్య పూజా తెలిపింది. గతంలో స్థానిక సంస్థల ఎన్నికల్లో పోటీచేసి వార్తల్లో నిలిచిన యోగేంద్ర.. తాజాగా రెండో సారి పెళ్లీ చేసుకుని చర్చనీయాశంగా మారాడు.
ఒక్కటైన మరుగుజ్జు జంట.. అంగరంగ వైభవంగా పెళ్లి..
కొద్ది రోజు క్రితం ఉత్తర్ప్రదేశ్లో ఓ మరుగుజ్జు జంట కూడా వివాహ బంధంతో ఒక్కటైంది. అలీగఢ్ జిల్లాలోని జీవన్గఢ్ ప్రాంతానికి చెందిన 26 ఏళ్ల ఇమ్రాన్ ఏడుగురు తోబుట్టువుల్లో చిన్నవాడు. ఇమ్రాన్ పొడవు కేవలం 3 అడుగుల 4 అంగుళాలే. దీంతో ఇమ్రాన్కు తగ్గ వధువు దొరకడం కష్టంగా మారింది. ఇమ్రాన్ హాటల్లో పనిచేస్తూ.. తన తల్లి బిర్జిస్తో కలిసి ఉంటున్నాడు. ఇమ్రాన్కు తగ్గ వధువు కోసం కుటుంబసభ్యులు వెతికే పనిలో ఉండగా.. తల్లి బిర్జిస్కు పట్వారీ నాగ్లాలోని భగవాన్గడి ప్రాంతానికి చెందిన 3 అడుగుల పొడవుండే ఖుష్బూ గురించి తెలిసింది. వెంటనే ఇమ్రాన్ తల్లి.. ఖుష్బూ కుటుంబసభ్యులతో మాట్లాడింది. వారు కూడా పెళ్లికి అంగీకరించారు. పెళ్లి కోసం ఇమ్రాన్ను.. అతని కుటుంబసభ్యులు తలపాగాతో పాటుగా నోట్ల దండ వేసి ముస్తాబు చేశారు. కుటుంబసభ్యుల ఆధ్వర్యంలో వీరి వివాహం అంగరంగ వైభవంగా జరిగింది. వీడియో కోసం ఇక్కడ క్లిక్ చేయండి.
