Drug Capsules Smuggling: బంగాల్ కోల్కతాలో అక్రమంగా డ్రగ్స్ సరఫరా చేస్తున్న విదేశీయుడిని పట్టుకున్నారు మాదక ద్రవ్యాల నియంత్రణ అధికారులు. బ్రెజిల్ నుంచి కోల్కతాకు వచ్చిన నిందితుడి కడుపులో నుంచి 44 డ్రగ్స్ మాత్రలను వెలికితీశారు. ఒక్కో మాత్ర బరువు సుమారు 14 గ్రాములు ఉంటుందని చెప్పారు. మొత్తం సుమారు అరకిలో కొకైన్ను స్వాధీనం చేసుకున్నట్లు అధికారులు వెల్లడించారు. బ్రెజిల్కు చెందిన 31 ఏళ్ల పాల్ సీజర్ కడుపులో డ్రగ్స్ మాత్రలు వేసుకుని కోల్కతాకు వచ్చాడు. విమానాశ్రయానికి చేరుకోగానే నిందితుడికి కడుపు నొప్పి మొదలైంది. దీంతో అప్రమత్తమైన అధికారులు.. హుటాహుటిన ఆస్పత్రికి తరలించారు. చికిత్స నిమిత్తం స్కానింగ్ చేయగా.. అసలు విషయం బయటపడింది.
దీనిపై కేసు నమోదు చేసుకున్న అధికారులు.. నిందితుడిని అరెస్ట్ చేసి శుక్రవారం కోర్టులో హాజరుపరిచారు. నిందితుడే స్వయంగా డ్రగ్స్ను మింగి అక్రమ రవాణా చేస్తున్నట్లు అధికారులు భావిస్తున్నారు. ఈ కేసులో సహకారం అందించిన వైద్యులకు మాదక ద్రవ్యాల నియంత్రణ అధికారులు కృతజ్ఞతలు తెలిపారు. డ్రగ్స్ ఎక్కడ నుంచి తీసుకువచ్చాడనే విషయంపై దర్యాప్తు చేపట్టారు.
ఇవీ చదవండి: పరికరం అమర్చి ఏటీఎంల్లో వరుస చోరీలు, చివరకు చిక్కాడిలా
2వేలకుపైగా తులసి మొక్కలతో భాజపా లోగో, వరల్డ్ రికార్డ్స్లో స్థానం
