డ్రగ్స్ తీసుకునే వారిని జైలుకు కాదని, రిహాబ్ సెంటర్లకు పంపించాలని కేంద్ర న్యాయశాఖ సహాయ మంత్రి రాందాస్ అఠవాలే అభిప్రాయపడ్డారు. ఇందుకోసం చట్టంలో మార్పులు చేయాలన్నారు. డ్రగ్స్ కేసులో ఆర్థర్ రోడ్డు జైలులో ఉన్న షారుక్ కుమారుడు ఆర్యన్ఖాన్ను ఉద్దేశించి పరోక్షంగా ఆయన ఈ వ్యాఖ్యలు చేశారు.
"మద్యం సేవించే వారు జైళ్లకు వెళ్లడం లేదు. కానీ డ్రగ్స్ తీసుకునే వారిని జైళ్లకు పంపేందుకు చట్టాలు ఉన్నాయి. డ్రగ్స్ తీసుకునే వారిని జైళ్లకు కాకుండా.. రిహాబ్కు పంపాలని మేము భావిస్తున్నాము. చట్టాలు మార్చాల్సిన అవసరం ఉంది."
--- రాందాస్ అఠవాలే, కేంద్రమంత్రి.
ఆర్యన్ఖాన్ రిహాబ్ సెంటర్కు వెళ్లాలని ఇటీవలే వ్యాఖ్యానించారు అఠవాలే.
'యుక్తవయస్సులో డ్రగ్స్ తీసుకోవడం మంచిది కాదు. ఆర్యన్ఖాన్కు మంచి భవిష్యత్తు ఉంది. ఆర్యన్ను రిహాబ్ సెంటర్కు పంపాలని షారుక్కు సూచిస్తాను. జైలులో కాకుండా.. 1-2 నెలలు అక్కడే ఉండాలి. దేశంలో ఇలాంటి కేంద్రాలు చాలా ఉన్నాయి. డ్రగ్స్ వ్యసనం నుంచి రెండు నెలల్లో బయటపడతాడు,' అని తెలిపారు అఠవాలే.
ఈ నెల 2న ముంబయిలోని ఓ క్రూజ్ షిప్లో డ్రగ్స్ పార్టీని ఎన్సీబీ బృందం అడ్డుకుంది. క్రూజ్లో ఉన్న ఆర్యన్ను 3వ తేదీన అరెస్ట్ చేశారు. ఈ కేసులో ఆర్యన్కు ఇంకా బెయిల్ లభించలేదు.
ఇదీ చూడండి:- జైలు ఖర్చుల కోసం ఆర్యన్కు రూ.4,500 మనియార్డర్
