బంగాల్ ఎన్నికల నేపథ్యంలో.. కలియాగంజ్ భాజపా అభ్యర్థి సౌమిన్ రాయ్ భార్య శర్బరీ సింఘా రాయ్ చేసిన వ్యాఖ్యలు చర్చనీయాంశంగా మారాయి. తన భర్త సౌమిన్ రాయ్ క్యారెక్టర్ మంచిది కాదని, అతనికి ఓటేయొద్దని మీడియా సమక్షంలో కలియాగంజ్ ప్రజలను కోరారు శర్బరీ. తన భర్త గురించి నిజాలను బయటపెట్టేందుకు మీడియా ముందుకొచ్చినట్లు తెలిపారు.
"యువకులకు ఉద్యోగాలు ఇప్పిస్తానని నమ్మించి.. వారి నుంచి చాలా డబ్బు దోచుకున్నాడు సౌమిన్. నన్ను, నా కూతుర్ని మోసం చేసి వేరే కాపురం పెట్టాడు. దయచేసి అతనికి ఓటేయొద్దు. ప్రజా ప్రతినిధి అయ్యే అర్హత అతనికి లేదు."
-శర్బరీ సింఘా రాయ్, సౌమిన్ రాయ్ భార్య
కలియాగంజ్ అభ్యర్థిగా సౌమిన్ను తొలగించాలని తాను.. రాష్ట్ర, కేంద్ర భాజపా నాయకులను కోరినట్లు శర్బరీ పేర్కొన్నారు. అయితే, తన వ్యాఖ్యలను ఎవ్వరూ పట్టించుకోలేదన్నారు. ఏ పార్టీకీ తాను మద్దతుగా మాట్లాడటం లేదని.. సౌమిన్కు వ్యతిరేకంగా ప్రచారం మాత్రం నిర్వహిస్తానని స్పష్టం చేశారు.
కలియాగంజ్ భాజపా అభ్యర్థిగా సౌమిన్ రాయ్ పేరును ప్రకటించినప్పటి నుంచి.. నియోజకవర్గంలో చాలా వ్యతిరేకత ఏర్పడింది. సౌమిన్ రాయ్ను తొలగించాలని స్థానిక భాజపా నాయకులు, కార్యకర్తలు నిరాహార దీక్ష సైతం చేపట్టారు.
బంగాల్ ఎన్నికల వేళ గతంలోనూ ఇలాంటి ఘటనలు వార్తల్లోకి వచ్చాయి. భాజపా అభ్యర్థి సౌమిత్రా ఖాన్, అతని భార్య సుజాతా మోండల్, శోవోన్ ఛటర్జీ, అతని భార్య రత్నా ఛటర్జీల వివాదాలు వార్తల్లో నిలిచాయి.
ఇదీ చదవండి : 'దిల్లీలో 30 శాతానికి చేరిన పాజిటివిటీ రేటు'
