Donkey milk business in India: డిగ్రీ చదివిన ఓ యువకుడు.. వినూత్న వ్యాపారం మొదలుపెట్టాడు. తమిళనాడు తిరునెల్వేలి జిల్లా తులుకపట్టి గ్రామంలో గాడిదల ఫామ్ను నెలకొల్పాడు. ఆ రాష్ట్రంలో తొలి గాడిదల ఫామ్ ఇదే కాగా.. ఈనెల 14న జరిగిన ప్రారంభోత్సవానికి తిరునెల్వేలి జిల్లా కలెక్టర్ విష్ణు ముఖ్యఅతిథిగా హాజరయ్యారు.
Donkey milk business plan: నెల్లాయ్ జిల్లాకు చెందిన బాబు.. 'ద డాంకీ ప్యాలెస్' ఫామ్కు యజమాని. అతడు వంద గాడిదలతో ఈ వ్యాపారం మొదలుపెట్టాడు. వాటి కోసం సకల సదుపాయాలు కల్పించాడు. పాలు తీసి, ప్రాసెస్ చేసి, నిల్వ చేసేందుకు అవసరమైన ఏర్పాట్లు చేశాడు.
Donkey milk price in India:భారత్లో గాడిదల సంఖ్య అంతకంతకూ తగ్గిపోతుండగా.. వాటి పాలకు మాత్రం డిమాండ్ క్రమంగా పెరుగుతోంది. ఎన్నో ఔషధ గుణాలు, పోషకాలు ఉండే గాడిద పాలను సౌందర్య ఉత్పత్తుల తయారీలో విక్రయిస్తారు. రోజూ సేకరించిన పాలను.. బెంగళూరులో సబ్బులు, ఇతర కాస్మోటిక్స్ తయారు చేసే సంస్థలకు సరఫరా చేయనున్నట్లు గాడిదల ఫామ్ యజమాని బాబు వెల్లడించారు. బహిరంగ మార్కెట్లో లీటరు గాడిద పాల ధర రూ.7వేల వరకు ఉంటుందని కలెక్టర్ విష్ణు చెప్పారు.
- బాబు తరహాలోనే ఒంటె పాలతో వ్యాపారం చేస్తూ భారీగా సంపాదిస్తున్నాడు తమిళనాడుకు చెందిన ఓ వ్యక్తి. పూర్తి వివరాల కోసం ఇక్కడ క్లిక్ చేయండి.
- గాడిద పాలతో తయారైన సౌందర్య ఉత్పత్తులు చూశారా!
దేశంలో గాడిద జనాభా ఇలా..: వినియోగం తగ్గటం, చోరీలు, మేత భూమి కొరత, అక్రమంగా వధించటం.. ఇలా కారణాలేవైనా దేశంలో గాడిదల సంఖ్య భారీగా తగ్గిపోతోంది. 2012 నుంచి 2019 వరకు.. అంటే ఎనిమిదేళ్ల వ్యవధిలో గాడిదలు 61 శాతం తగ్గినట్లు ఓ అధ్యయనం తేల్చింది. 'బ్రూక్‌ ఇండియా' అనే సంస్థ దేశంలో గాడిదల ఉనికి, ఈ మూగ జంతువులతో చేస్తున్న అక్రమ వ్యాపారాలపై అధ్యయనం చేసింది.
దేశంలో అక్షరాస్యత పెరగడం, మోతకు గాడిదలను వాడే ఇటుకల పరిశ్రమ వంటి వాటిలో యంత్రాలు రావడం, రవాణాకు కంచర గాడిదల వైపు మొగ్గుచూపటం వంటి కారణాలతో కూడా గాడిదల సంఖ్య తగ్గుతున్నట్లు అధ్యయనం పేర్కొంది. గాడిదలను అక్రమంగా రవాణా చేయడం, వాటి తోలు, మాంసం అక్రమ మార్గాల్లో దేశ సరిహద్దులు దాటించడం కూడా గాడిదల సంఖ్య తగ్గడానికి కారణాలు అవుతున్నట్లు 'బ్రూక్‌ ఇండియా' తేల్చింది. మందుల తయారీ కోసం గాడిదల చర్మం చైనాకు ఎక్కువగా రవాణా అవుతోంది. 'ఎజియావో' అనే ఈ ఔషధం పలురకాల రుగ్మతలకు చికిత్సలో వాడతారు.
ప్రస్తుతం భారత్లో లక్షా 40 వేల గాడిదలు ఉన్నాయి. తమిళనాడులో వాటి సంఖ్య 428 మాత్రమే.
