Divyang Navratri Mahotsav 2023 : దివ్యాంగుల కోసం స్పెషల్ గర్బా ఈవెంట్.. ఒకే వేదికపై 700 మంది సందడి

Divyang Navratri Mahotsav 2023 : గుజరాత్​లోని అహ్మదాబాద్​లో ఒకే వేదికపై 700 మంది దివ్యాంగులు 'గర్బా' నృత్యాలు చేసి అందరినీ ఆశ్చర్యపరిచారు. నవరాత్రి వేడుకల సందర్భంగా ఏర్పాటు చేసిన 'దివ్యాంగ్​ మహోత్సవ్​'లో వీరంతా ఆనందంగా గడిపారు.

Divyang Navratri Mahotsav 2023 : గుజరాత్​లో ఒకే వేదికపై వందల మంది దివ్యాంగులు ఆనందంగా 'గర్బా' నృత్యాలు చేశారు. దివ్యాంగుల్లో స్ఫూర్తి నింపేందుకు ప్రత్యేకంగా ఈ కార్యక్రమం ఏర్పాటు చేశారు విపుల్​భాయ్ అనే వ్యక్తి. ఈ గర్బా కార్యక్రమంలో సుమారు 700 మంది దివ్యాంగులు పాల్గొని సందడి చేశారు. చక్రాల కుర్చీలలో కూర్చొని గర్బా ఆడారు.

అయితే, దివ్యాంగుల కోసం ఈ కార్యక్రమాన్ని గొప్ప మనసుతో ప్రారంభించారు విపుల్ భాయ్. అహ్మదాబాద్​కు చెందిన ఆయన ఓసారి మిత్రులతో కలిసి మైదానంలో గర్బానృత్యం చేద్దామని వెళ్లారు. అందరూ డ్యాన్స్ చేస్తున్న సమయంలో.. అక్కడ ఓ చోట కూర్చున్న దివ్యాంగుడిని చూసి చలించిపోయారాయన. దివ్యాంగుల కోసం ఏదైనా చేయాలని ఆరోజే నిర్ణయించుకున్నారు విపుల్. వారి కళ్లల్లో ఆనందాన్ని చూడాలని అనుకున్న ఆయన వారికోసం ప్రత్యేకంగా గర్బా ఏర్పాటు చేశారు. గత ఆరేళ్లుగా విపుల్ భాయ్ ఈ కార్యక్రమాన్ని నిర్వహిస్తూ వస్తున్నారు. ఈ సంవత్సరం ఏర్పాటు చేసిన కార్యక్రమంలో 700 మంది దివ్యాంగులు పాల్గొన్నారు. వారంతా ఉత్సాహాంగా గర్బా నృత్యాలు చేశారు.

Divyang Navratri Mahotsav in Ahmedabad : నవరాత్రుల సందర్భంగా నిర్వహించిన దివ్యాంగ్ మహోత్సవ్ కార్యక్రమంలో పాల్గొన్న ఓ వ్యక్తి.. విపుల్​ భాయ్ తీసుకున్న చొరవ పట్ల ఆనందం వ్యక్తం చేశారు. ఈ కార్యక్రమం వల్ల తమ పరిచయాలు పెరిగాయని అన్నారు. "విపుల్ భాయ్ నిర్వహిస్తున్న దివ్యాంగ్ గర్బా మహోత్సవ్​కు గత 6 ఏళ్లుగా వస్తున్నాను. ఇక్కడకు వచ్చి పండగ వాతావరణాన్ని ఆస్వాదిస్తున్నాను. చాలా మందితో కొత్త స్నేహాలు, పరిచయాలు ఏర్పడ్డాయి. దివ్యాంగులమైన మేము గర్బా ఆడలేమని అందరూ అనుకుంటారు. అయితే దీని నిర్వాహకుడు విపుల్ భాయ్ మాత్రం అలా ఆలోచించలేదు. మేము కూడా వారిలో ఒకరం అనుకుని ఈ కార్యక్రమం నిర్వహిస్తున్నారు" అని తెలిపారు.

తొమ్మిది రోజుల నవరాత్రి ఉత్సవాల్లో భాగంగా భక్తులు దుర్గాదేవి ఆశీర్వాదం పొందడానికి అత్యంత భక్తి శ్రద్ధలతో పూజలు చేస్తారు. ఒక్కో రోజు ఒక్కో దేవతా స్వరూపంలో భక్తులకు అమ్మవారు దర్శనమిస్తారు. ఆనందకరమైన జీవితాన్ని ప్రసాదించాలని ఆ దుర్గమ్మను కోరుతారు. నవరాత్రి పండుగ మహిషాసురుడమే రాక్షసుని సంహరించిన సందర్భంగా నిర్వహిస్తారు. దేశం నలు మూలలా ఈ పండుగను జరుపుకొంటారు. ఈ సందర్భంగా గుజరాత్​లో గర్బా నృత్యాలు చేస్తుంటారు. ఉత్తర్​ప్రదేశ్, ఉత్తరాఖండ్, హరియాణా, గుజరాత్, మధ్యప్రదేశ్​లో నవరాత్రుల సందర్భంగా రామ్​లీలా విస్తృతంగా నిర్వహిస్తారు. ఈ సందర్భంగా రావణుడిపై రాముడు విజయం సాధించిన నాటికను ప్రదర్శిస్తారు.