టూల్​కిట్​ దర్యాప్తుపై దిల్లీ కోర్టుకు దిశ రవి

పర్యావరణ కార్యకర్త దిశ రవి దిల్లీ హైకోర్టును ఆశ్రయించారు. టూల్​కిట్ విషయంలో తనపై నమోదైన కేసుకు సంబంధించిన దర్యాప్తు వివరాలను పోలీసులు బహిర్గతం చేయకుండా చూడాలని కోరుతూ పిటషన్​ దాఖలు చేశారు.

టూల్​కిట్​ వివాదం నేపథ్యంలో అరెస్టయిన పర్యావరణ కార్యకర్త దిశా రవి గురువారం దిల్లీ హైకోర్టును ఆశ్రయించారు. తనపై నమోదైన కేసుకు సంబంధించిన దర్యాప్తు వివరాలను పోలీసులు... మీడియాకు బహిర్గతం చేయకుండా చూడాలని కోరుతూ పిటిషన్​ దాఖలు చేశారు.

దీనికి సంబంధించి విచారణ త్వరగా జరపాలని దిశా తరఫు నాయవ్యాది అభినవ్ సేక్రి కోర్టును అభ్యర్థించారు. మీడియా కూడా దిశా రవి వ్యక్తిగత వాట్సాప్​ చాట్​ను బహిర్గతం చేయకూడదని పిటిషన్​లో పేర్కొన్నారు.

ఇదీ జరిగింది...

సాగు చట్టాలకు వ్యతిరేకంగా దిల్లీ సరిహద్దుల్లో 3 నెలలుగా అన్నదాతలు ఉద్యమిస్తున్నారు. వారికి మద్దతుగా నిలిచారు పర్యావరణ కార్యకర్త గ్రెటా థన్​బర్గ్. ఉద్యమాన్ని మరింత ముందుకు తీసుకెళ్లేందుకు​ ట్విట్టర్​లో ఓ టూల్​ కిట్​ను పోస్టు చేశారు.

గ్రెటా షేర్​ చేసిన టూల్​ కిట్​ రూపకల్పన, వ్యాప్తిలో దిశ కీలక కుట్రదారని పోలీసులు అంటున్నారు. అందుకోసం వాట్సాప్​లో ఆమె ఓ గ్రూప్​ నిర్వహించినట్లు చెప్పారు. అందులో భాగస్వాములైన మరికొందరిపై కేసులు నమోదు చేస్తున్నట్లు తెలిపారు. ఈ ప్రక్రియలో వారు భారత్​కు వ్యతిరేకంగా పనిచేస్తున్న ఖలిస్థాన్ అనుకూల 'పొయెటిక్ జస్టిస్ ఫౌండేషన్'​ సంస్థతో చేతులు కలిపారని వివరించారు. దిశనే గ్రెటాకు ఈ టూల్​ కిట్​ షేర్ చేశారని పోలీసులు తెలిపారు.

దిశపై దేశ ద్రోహం సహా కుట్ర, విద్వేషాలను రెచ్చగొట్టడం వంటి పలు అభియోగాలతో కేసు నమోదైంది. దర్యాప్తులో భాగంగా మరికొన్ని అరెస్టులు జరుగుతాయని దిల్లీ పోలీసులు చెప్పారు.

ఇదీ చదవండి:'టూల్​కిట్'​ అరెస్టులపై రాజకీయ రగడ