బంగాల్ ముఖ్యమంత్రి, టీఎంసీ అధినేత్రి మమతా బెనర్జీ, ఆమె పార్టీ పరిస్థితి 'వినాశకాలే విపరీత బుద్ధి'లా మారిందని ప్రధానమంత్రి నరేంద్ర మోదీ ధ్వజమెత్తారు. అందువల్లే తనతో పాటు ఎస్సీ, ఎస్టీ, ఓబీసీలపై బహిరంగ యుద్ధం ప్రకటించారని చెప్పారు. బారాసత్లో ఏర్పాటు చేసిన బహిరంగ సభలో పాల్గొన్న ఆయన.. దీదీకి ప్రతి విషయంలో కోపం వస్తోందని ఎద్దేవా చేశారు.
"మీ(సభికులను ఉద్దేశించి) ఫోన్లలో ఫ్లాష్లైట్లు ఆన్ చేసి ఈ ప్రాంతంలో వెలుగులు నింపడాన్ని చూస్తే మే రెండో తేదీ మీకు అప్పుడే వచ్చేసిందని తెలుస్తోంది. నాపై మీకున్న ప్రేమ.. దీదీని బాధపెడుతోంది. నాలుగు దశల ఎన్నికల తర్వాత భాజపా విజయం ఖాయమైన విషయంపై మమత కోపంగా ఉన్నారు."
-నరేంద్ర మోదీ, ప్రధానమంత్రి
శాంతియుత ఎన్నికలను మమత ఎప్పుడూ కోరుకోలేదని అన్నారు మోదీ. భారీ సంఖ్యలో ప్రజలు భాజపాకు ఓటేస్తారని దీదీకి తెలుసని.. అందుకే అధిక ఓటింగ్ శాతాన్ని మమత వ్యతిరేకిస్తారని చెప్పారు. బంగాల్లో హింసకు మమతా బెనర్జీనే బాధ్యురాలని ఆరోపించారు. 'హింసకు కారణం తన గూండాలేనని దీదీకి తెలుసు. కాబట్టి వాటి గురించి ఆమె మాట్లాడరు. ప్రతిదీ ఆమె కనుసన్నల్లోనే జరుగుతోంది' అని చెప్పారు మోదీ.
బంగాల్ ప్రజలు చూపిస్తున్న ప్రేమకు ధన్యవాదాలు తెలిపారు మోదీ. ఈ ప్రేమను వడ్డీతో కలిపి తిరిగి చెల్లిస్తానని హామీ ఇచ్చారు.
ఇదీ చదవండి: 'బంగాల్లో భాజపా సెంచరీ.. మమత క్లీన్ బౌల్డ్'
