కొవిడ్ ఇతర వేరియంట్లతో పోలిస్తే డెల్టా ప్లస్ వైరస్కు ఊపిరితిత్తుల కణజాలంతో ఎక్కువ సంబంధం ఉంటోందని కరోనా వర్కింగ్ గ్రూప్(నేషనల్ టెక్నికల్ అడ్వైజరీ గ్రూప్ ఆన్ ఇమ్యూనైజేషన్-NTAGI) ఛైర్మన్ డాక్టర్ ఎన్కే అరోడా పేర్కొన్నారు. అయితే, వైరస్ తీవ్రంగా వ్యాపిస్తోందనేందుకు ఇది కారణం కాదని అన్నారు. మరిన్ని కేసులు వెలుగులోకి వస్తేనే ఈ వేరియంట్ ప్రభావంపై స్పష్టత వస్తుందని అన్నారు. కరోనా టీకా(ఒక్క డోసు అయినా) తీసుకున్నవారిలో డెల్టా ప్లస్ వేరియంట్ ప్రభావం చాలా తక్కువగా ఉందని చెప్పారు.
"ఇతర వేరియంట్లతో పోలిస్తే.. ఊపిరితిత్తుల శ్లేష్మ పొరకు, డెల్టా ప్లస్ వైరస్కు ఎక్కువ సంబంధం ఉంది. కానీ ఇది ఊపిరితిత్తులకు నష్టం కలిగిస్తుందా అనే విషయంపై స్పష్టత లేదు. అయితే దీనర్థం.. వ్యాధి తీవ్రంగా ఉంటుందనో, వ్యాప్తి ఎక్కువగా ఉంటుందనో మాత్రం కాదు."
-ఎన్కే అరోడా, కరోనా వర్కింగ్ గ్రూప్ ఛైర్మన్
డెల్టా ప్లస్ కేసుల సంఖ్య ఎక్కువగా ఉండొచ్చని అరోడా అభిప్రాయపడ్డారు. లక్షణాలు లేని వారిలోనూ ఈ వైరస్ ఉండొచ్చని పేర్కొన్నారు. ఈ నేపథ్యంలో.. వైరస్ జన్యు పర్యవేక్షణ వేగంగా జరగాలని అన్నారు. డెల్టా ప్లస్ వేరియంట్ను గుర్తించేందుకు కొన్ని రాష్ట్రాలు జిల్లా స్థాయిలో ప్రణాళికలు అమలు చేస్తున్నాయని తెలిపారు. అయితే, డెల్టా ప్లస్ మూడో దశ కరోనా వ్యాప్తికి కారణమవుతుందా అనే విషయాన్ని ఇప్పుడే చెప్పలేమని అన్నారు.
"కరోనా వ్యాప్తి దశలు.. కొత్త వేరియంట్లు లేదా మ్యుటేషన్లపై ఆధారపడి ఉంటాయి. డెల్టా అనేది కొత్త వేరియంట్ అయి ఉండొచ్చు. కానీ ఇది మూడో వేవ్కు కారణమవుతుందా అనేది రెండు, మూడు అంశాలను బట్టి చెప్పలేం. రెండో దశలో ఎంతమందికి కరోనా సోకింది, టీకా పంపిణీ ఏ విధంగా ఉంటుందేనే విషయాలనూ పరిగణనలోకి తీసుకోవాల్సి ఉంటుంది."
-ఎన్కే అరోడా, కరోనా వైరస్ వర్కింగ్ గ్రూప్ ఛైర్మన్
జూన్ 11న డెల్టా ప్లస్ వేరియంట్ను గుర్తించారు. దీన్ని ఆందోళనకరమైన వేరియంట్గా ఇటీవల కేంద్రం ప్రకటించింది. ఇప్పటివరకు 12 రాష్ట్రాల్లో 51 డెల్టా ప్లస్ కేసులు బయటపడ్డాయి. మహారాష్ట్రలో ఈ కేసులు అధికంగా నమోదయ్యాయి.
ఇవీ చదవండి:
