''ఆక్సిజన్ ఎక్స్​ప్రెస్'​ కోసం దిల్లీ, ఏపీ​ అభ్యర్థన'

దేశంలో ప్రాణవాయువు కొరత ఏర్పడుతున్న తరుణంలో.. తమకు ఆక్సిజన్​ సరఫరా చేయాలని దిల్లీ ప్రభుత్వం కోరినట్టు రైల్వే బోర్డు ఛైర్మన్​ సునీత్​ అరోరా వెల్లడించారు. దిల్లీతోపాటు మరికొన్ని రాష్ట్రాల నుంచి ఇలాంటి అభ్యర్థనలు వచ్చినట్టు తెలిపారు.

దిల్లీలో కొవిడ్​ రోగుల కోసం 'ఆక్సిజన్​ ఎక్స్​ప్రెస్'​ రైళ్లు కావాలని కేజ్రీవాల్​ సర్కార్​ కోరినట్టు రైల్వే బోర్డు ఛైర్మన్​ సునీత్​ అరోరా వెల్లడించారు. ఇదే తరహాలో ఉత్తర్​ప్రదేశ్​, మధ్యప్రదేశ్​, ఆంధ్రప్రదేశ్​ నుంచీ అభ్యర్థనలు వచ్చాయని ఆయన తెలిపారు.

"ప్రాణవాయువు సరఫరా కోసం దిల్లీ నుంచి అభ్యర్థన అందింది. అందుకు సంబంధించిన ప్రణాళికను మేం సిద్ధం చేస్తున్నాం. రవూర్కెలా కర్మాగారాం నుంచి మాకు ఆక్సిజన్​ అందుబాటులో ఉంది. అదే విధంగా ఆంధ్రప్రదేశ్​ ప్రభుత్వం తమకు.. అంగూల్(ఒడిశా) నుంచి ప్రాణవాయువు సరఫరా చేయాలని కోరింది."

- సునీత్​ అరోరా, రైల్వే బోర్డు ఛైర్మన్​

ప్రస్తుతం మహారాష్ట్రకు వెళ్తున్న ఆక్సిజన్​ ఎక్స్​ప్రెస్​.. శుక్రవారం రాత్రికి నాగ్​పుర్​కు చేరుకుంటుందని సునీత్​ తెలిపారు. మరో రైలు శనివారం లఖ్​నవూకు వెళ్తుందని ఆయన చెప్పారు.

ఆక్సిజన్​ ఎక్స్​ప్రెస్​లో ప్రతి ట్యాంకర్​లో 16 టన్నుల ప్రాణవాయువు నిల్వ చేయొచ్చని సునీత్​ తెలిపారు. ఇవి గంటకు 65 కిలోమీటర్ల వేగంతో ప్రయాణిస్తాయని ఆయన పేర్కొన్నారు.

ఇదీ చదవండి: 'మే 15కు కరోనా ఉగ్రరూపం.. ఆ తర్వాత...'