కేరళను భారీ వర్షాలు కుదిపేస్తున్నాయి. రాష్ట్రవ్యాప్తంగా 38 మంది ప్రాణాలు కోల్పోయారు. ఇడుక్కి జిల్లా కొక్కయార్లో కొండచరియలు విరిగిపడిన ఘటనలో ఏడుగురు, కొట్టాయం కూట్టిక్కల్లో 12 మంది మరణించారు. పలువురు శిథిలాల కింద చిక్కుకున్నట్లు అనుమానిస్తున్నారు. గాలింపు చర్యలు కొనసాగుతున్నాయి.
అలప్పుజా, కొట్టాయం జిల్లాలు వర్షాలకు తీవ్రంగా ప్రభావితమయ్యాయి. కన్నూర్, కాసరగోడ్ జిల్లాలకు ఎల్లో అలర్ట్, తిరువనంతపురం, కొల్లం, పతనంథిట్ట, కొట్టాయం, ఎర్నాకుళం, ఇడుక్కి, త్రిస్సూర్, పాలక్కడ్, మలప్పురం, కోజికోడ్, వాయనాడ్ జిల్లాలకు ఆరెంజ్ అలర్ట్ జారీ చేసింది ప్రభుత్వం. నిరాశ్రయుల కోసం.. రాష్ట్రవ్యాప్తంగా 281 పునరావాస శిబిరాలు ఏర్పాటు చేసింది. ప్రస్తుతం 10 వేలకుపైగా ప్రజలు అక్కడ ఆశ్రయం ఉంటున్నారు.
కేరళలో 11 ఎన్డీఆర్ఎఫ్ బృందాలు, సైన్యం, రాష్ట్ర విపత్తు నిర్వహణ యంత్రాంగం.. సహాయక చర్యలు చేపడుతున్నాయి. వాయుసేన విమానాలు కూడా బాధితులను తరలించేందుకు సహాయపడుతున్నాయి.
నిండుకుండలా డ్యాంలు..
భారీ వర్షాలు, వరదల కారణంగా.. డ్యాంలు నిండుకుండలా మారుతున్నాయి. నీటిమట్టం ప్రమాదకరస్థాయికి చేరుతున్న నేపథ్యంలో.. చెరుథేని డ్యాం గేట్లు తెరిచి నీటిని బయటకు వదులుతున్నారు అధికారులు. రాష్ట్రానికి మరింత వర్షసూచన నేపథ్యంలో.. మంగళవారం ఉదయమే ఇడమలయార్, పంపా రిజర్వాయర్లలోనూ నీటిని విడుదల చేశారు. ఈ దృశ్యాలు వీక్షించేందుకు జనం భారీగా తరలివచ్చారు.
రాష్ట్ర విపత్తు నిర్వహణ యంత్రాంగం(ఎస్డీఎంఏ) ప్రకారం.. వర్షాలకు 90కిపైగా ఇళ్లు కొట్టుకుపోయాయి. మరో 700కుపైగా ఇళ్లు పాక్షికంగా దెబ్బతిన్నాయి.
ఇదీ చూడండి: ఉత్తరాఖండ్లో భారీగా హిమపాతం.. రాష్ట్రంలో రెడ్ అలర్ట్
