మనకు తెలియకుండానే ఒక్కొసారి మన బ్యాంక్ అకౌంట్లో డబ్బులు పడుతుంటాయి. బ్యాంక్ల సాంకేతిక కారణాల వల్ల ఇలా జరుగుతుంటుంది. ఆ డబ్బుల్ని మళ్లీ బ్యాంక్ అధికారులు మన నుంచి స్వాధీనం చేసుకుంటారు. అయితే బంగాల్కు చెందిన ఓ దినసరి కూలీ బ్యాంక్ అకౌంట్లో ఏకంగా రూ.100 కోట్లు జమ అయ్యాయి. దీంతో ఏం చేయాలో ఆ కూలీకి అర్థంకాక తికమకపడ్డాడు. అప్పుడు ఏం జరిగిందంటే..
దేగంగాలోని వాసుదేవ్పుర్కు చెందిన మహ్మద్ నసీరుల్లా(26) వ్యవసాయ కూలీ. అతడికి తల్లిదండ్రులతో పాటు భార్య, ఇద్దరు పిల్లలు ఉన్నారు. నసీరుల్లా సంపాదనతోనే ఆ కుటుంబం గడుస్తోంది. నసీరుల్లాకు స్టేట్ బ్యాంక్ ఆఫ్ ఇండియాలో బ్యాంక్ అకౌంట్ ఉంది. ఆ బ్యాంక్ అకౌంట్ నుంచి అప్పుడప్పుడు నసీరుల్లా లావాదేవీలు జరిపేవాడు. అందులో కేవలం రూ.17 మాత్రమే ఉంది. అయితే ఇటీవల ఆయన అకౌంట్లో రూ.100 కోట్లు జమ అయ్యాయి. దీంతో ఆయనకు జంగీపుర్ సైబర్ క్రైమ్ పోలీసులు నోటీసులు పంపారు. మే 30 లోగా ఆ డబ్బుకు సంబంధించిన పత్రాలు తీసుకురావాలని ఆ నోటీసుల్లో పేర్కొన్నారు. ఆ డబ్బులు ఎవరు నసీరుల్లా బ్యాంకు ఖాతాలో వేశారనే విషయాన్ని కనుగొనడంలో పోలీసులు నిమగ్నమయ్యారు.
పోలీసులు నోటీసులు జారీ చేయడం వల్ల నసీరుల్లా భయపడుతున్నాడు. ఇంత డబ్బు తన ఖాతాలోకి ఎలా వచ్చిందో అర్థం కాక తలపట్టుకున్నాడు. తనకు అకౌంట్ ఉన్న బ్యాంక్ను సంప్రదించిన జరిగిన విషయాన్ని చెప్పాడు. దీంతో బ్యాంకు అధికారులు నసీరుల్లా బ్యాంక్ అకౌంట్ను బ్లాక్ చేశారు.
"నేను దినసరి కూలీని. వ్యవసాయ పనులకు వెళ్లి కుటుంబాన్ని పోషించుకుంటున్నాను. సైబర్ క్రైమ్ పోలీసులు నోటీసులు పంపారు. వాటిని ఓ చదువుకున్న యువకుడితో చదివించా. రూ. 100 కోట్ల నా బ్యాంకు ఖాతాలోకి వచ్చిందని అందులో ఉంది. ఆ డబ్బుకు సంబంధించిన పత్రాలు పట్టుకుని పోలీసుల ఎదుట హాజరుకావాలని ఉంది. చాలా భయంగా ఉంది. అసలు ఆ డబ్బులు ఎలా నా బ్యాంక్ అకౌంట్లోకి వచ్చాయో నాకు తెలియదు."
--మహ్మద్ నసీరుల్లా, దినసరి కూలీ
100 మంది ఖాతాల్లో రూ.13 కోట్ల జమ..
గతేడాది మేలో తమిళనాడు చెన్నైలోని టీనగర్ హెచ్‌డీఎఫ్‌సీ బ్యాంకుకు చెందిన 100 మంది ఖాతాదారులు ఒక్కసారిగా కోటీశ్వరులయ్యారు. తమ మొబైల్ ఫోన్లకు వచ్చిన మెసేజ్లు చూసి అవాక్కయ్యారు. తమ ఖాతాలో రూ.13 కోట్లు జమ అయి ఉండడం చూసి షాక్ అయ్యారు. వారిలో కొంతమంది ఈ విషయాన్ని బ్యాంకు అధికారులకు తెలియజేశారు. మరికొందరు సైలంట్గా ఉన్నారు. అప్పుడు బ్యాంక్ అధికారులు ఏం చేశారంటే?.. ఈ పూర్తి వార్త కోసం ఇక్కడ క్లిక్ చెయ్యండి.
