బంగాళాఖాతంలో ఏర్పడిన యాస్ తుపాను.. తీవ్రరూపం దాల్చింది. భీకర గాలులు, భారీ వర్షాలతో మొదలైన తుపాను.. క్రమంగా బలపడి ఒడిశా, బంగాల్లోని తీర ప్రాంతాలను అతలాకుతలం చేసింది. ఒడిశా భద్రక్ జిల్లా ధామ్రా ప్రాంతంలో భారీ వర్షపాతం నమోదైంది.
ధ్రామ్రా వద్ద..
ఒడిశాలోని ధామ్రా వద్ద తుపాను తీరాన్ని తాకిందని ఐఎండీ తెలిపింది. మరికొద్ది గంటల్లో ఉత్తర ఒడిశా, బంగాల్ మధ్య తీరం దాటే అవకాశం ఉందని అంచనా వేసింది. తుపాను ధాటికి ఝార్ఖండ్, బిహార్, అసోం, మేఘాలయాలోనూ వర్షాలు కురిసే అవకాశం ఉందని పేర్కొంది. గురువారం ఉదయం కల్లా తుపాను ఝార్ఖండ్ చేరుకుంటుందని ఐఎండీ డీజీ మృత్యుంజయ్ మోహపాత్ర తెలిపారు.
ఇద్దరు మృతి..
యాస్ తుపాను ప్రభావానికి ఆనంద్పుర్, బాలేశ్వర్ ప్రాంతాల్లో చెట్టు కూలి ఇద్దరు మృతి చెందారు.
నివాసిత ప్రాంతాలు జలమయం
తుపాను ధాటికి బంగాల్లోని తూర్పు మిడ్నాపుర్ వద్ద ఉన్న నివాసిత ప్రాంతాలు పూర్తిగా నీటమునిగాయి. ఇళ్లు, పంటపొలాలు దెబ్బతిన్నాయి. 11 లక్షల మందిని సురక్షిత ప్రాంతాలకు తరలించారు అధికారులు. తుపాను దృష్ట్యా ఒడిశా, బంగాల్‌కు ఎన్డీఆర్‌ఎఫ్‌ బృందాలను తరలించారు ఉన్నాతాధికారులు. బంగాల్లో 74 వేల మంది సిబ్బంది, 2 లక్షల మంది పోలీసులను మోహరించారు. యాస్ తుపాను ధాటికి బంగాల్లోని కపిళముని దేవాలయం నీటమునిగింది.
విమాన సర్వీసులు రద్దు..
యాస్ తుపాను కారణంగా దేశవ్యాప్తంగా పలు విమాన సర్వీసులు రద్దయ్యాయి. ముంబయిలోని ఛత్రపతి శివాజీ అంతర్జాతీయ విమానాశ్రయంలో బంగాల్, ఒడిశాలకు వెళ్లే పలు విమానాలను రద్దు చేశారు. అయితే మిగతా విమాన సర్వీసులు షెడ్యూల్ ప్రకారమే నడుస్తాయని విమానాశ్రయం అధికారులు తెలిపారు. రేపు సా. 5 గంటల వరకు భువనేశ్వర్‌ విమానాశ్రయం మూసివేస్తూ అధికారులు నిర్ణయం తీసుకున్నారు.
ఇదీ చదవండి : యాస్ తుపాను: చెట్టు కూలి ఇద్దరు మృతి
