Cube Solving Record : పంజాబ్లోని బఠిండాకు చెందిన ఓ విద్యార్థిని.. ఒకటి నుంచి 50 మ్యాథ్స్ క్యూబ్లను రెండు నిమిషాల్లోనే టకాటకా చెప్పేస్తోంది. తన అరుదైన ప్రతిభతో ఇప్పటికే ఇండియా బుక్ ఆఫ్ రికార్డ్స్లో స్థానం సంపాదించిన బాలిక.. తాజాగా ఇంటర్నేషనల్ బుక్ ఆఫ్ రికార్డ్స్లో తన పేరును లిఖించుకుంది.
బఠిండాకు చెందిన 15 ఏళ్ల బాలిక అపేక్ష.. స్థానికంగా ఓ పాఠశాలలో పదో తరగతి చదువుతోంది. చిన్నప్పటి నుంచి గణిత శాస్త్రం అంటే ఎంతో ఇష్టపడే అపేక్ష.. అందరిలో కాస్త ప్రత్యేకంగా ఉండాలని నిర్ణయించుకుంది. అందుకు అనుగుణంగా సాధన చేసి క్యూబ్లను సెకన్లలోనే పరిష్కరిస్తోంది. ఒకటి నుంచి 50 క్యూబ్లను కేవలం రెండు నిమిషాల్లోనే చెప్పేస్తున్న ఆ బాలిక.. 2022లో ఇండియా బుక్ ఆఫ్ రికార్డ్స్లో స్థానం సంపాదించుకుంది. తాజాగా ఇంటర్నేషనల్ బుక్ ఆఫ్ రికార్డ్స్లో పేరు నమోదు చేసుకుంది. అందుకు సంబంధించిన ధ్రువీకరణ పత్రం, పతకాన్ని సైతం అందుకుంది.
తల్లిదండ్రులే మార్గదర్శకులు!
రోజూ 7-8 సార్లు రెండు గంటల పాటు సాధనం చేస్తానని అపేక్ష తెలిపింది. ఉపాధ్యాయులైన తన తల్లిదండ్రులు ప్రాక్టీస్లో ముఖ్యమైన పాత్ర పోషిస్తారని చెప్పింది. ఎప్పటికప్పుడు మార్గనిర్దేశం చేస్తుంటారని పేర్కొంది. తాను భవిష్యత్తులో వైద్యురాలిగా సేవలు అందించాలనుకుంటున్నట్లు తెలిపింది.
'శిక్షణే కాదు.. ప్రాక్టీస్ కూడా..'
అపేక్ష తన కుమార్తె మాత్రమే కాదని విద్యార్థిని కూడా అని ఆమె తండ్రి రాజీవ్ కుమార్ చెప్పారు. "విద్యార్థులకు శిక్షణ ఇవ్వడమే కాకుండా.. ప్రాక్టీస్ చేయమని ప్రోత్సహించాలి. ఒకసారి విద్యార్థులు.. తమకు తాము లక్ష్యాన్ని నిర్దేశించుకుంటే రాత్రి పగలు కష్టపడాలి. తన కుమార్తె సాధించిన ఘనతల పట్ల చాలా సంతోషంగా ఉంది. తన లక్ష్యాలకు మా వంతు సహకారం అందిస్తున్నాం" అని రాజీవ్ చెప్పారు.
చదువును ఎప్పుడూ భారంగా భావించవద్దని రాజీవ్ కుమార్ తెలిపారు. ప్రాచీన పద్ధతుల ద్వారా విద్యార్థులకు చదువు చెప్పే ప్రయత్నం చేయాలని సూచించారు. ప్రస్తుత కాలంలో యంత్రాలపై విద్యార్థులు ఎక్కువగా ఆధారపడుతున్నారని అన్నారు. దీని కారణంగా వారి మెదడుకు వ్యాయామం అవ్వడం లేదని తెలిపారు. పిల్లలు.. గణితాన్ని ఎక్కువగా సాధన చేయాలని సూచించారు.
22 ఏళ్లు.. 9వేల కాలేజ్ 'బ్రోచర్లు' సేకరణ.. గిన్నిస్ రికార్డు సృష్టించిన పోలీస్!
పేక ముక్కలతో మ్యాజిక్! నిమిషంలో 18 కార్డులను పుచ్చకాయలో దించి రికార్డు.. 'గిన్నిస్' దాసోహం
