Covid Cases in India: ఒమిక్రాన్ వ్యాప్తి నేపథ్యంలో మరోసారి ఆందోళనకర స్థాయిలో కరోనా కేసులు నమోదవుతున్నాయి. మహారాష్ట్రలో కొత్తగా 26,538 కరోనా కేసులు నమోదయ్యాయి. 8 మంది మృతిచెందగా 5,331 మంది కోలుకున్నారు. యాక్టివ్ కేసుల సంఖ్య 87,505కు చేరింది. రాష్ట్రంలో ఒమిక్రాన్ కేసుల సంఖ్య 797కు చేరగా.. 330 మంది కోలుకున్నారు.
ముంబయిలో కొత్తగా 15,166 కేసులు వెలుగుచూశాయి. ముగ్గురు ప్రాణాలు కోల్పోయారు. నగరంలో యాక్టివ్ కేసుల సంఖ్య 61,923గా ఉంది.
దిల్లీలో రికార్డు స్థాయిలో కరోనా కేసులు నమోదవుతున్నాయి. బుధవారం కొత్తగా 10,665 కేసులు నమోదయ్యాయి. పాజిటివిటీ రేటు 11.88 శాతంగా ఉంది. గతేడాది మే 12 తర్వాత ఈ స్థాయిలో కొవిడ్ కేసులు నమోదు కావడం ఇదే తొలిసారి.
మరోవైపు నగరంలో మరణాల రేటు కూడా పెరుగుతోంది. ఇవాళ 8 మంది ప్రాణాలు కోల్పోయారు. గతేడాది జూన్ 16 తర్వాత దిల్లీలో నమోదైన అత్యధిక మరణాల సంఖ్య ఇదే. ఆసుపత్రిలో చేరుతున్న వారి సంఖ్య కూడా పెరిగింది. ఈనెల 3,4 తేదీల్లో 140 మంది ఆసుపత్రులలో చేరారని అధికారులు వెల్లడించారు.
- బంగాల్లో మరో 14,022 మంది వైరస్ బారినపడ్డారు. 17 మంది చనిపోయారు.
- కేరళలో కొత్తగా 4,801 కొవిడ్ కేసులు నమోదయ్యాయి. 1813 మంది కోలుకోగా 29 మంది మృతిచెందారు. యాక్టివ్ కేసుల సంఖ్య 22,910గా ఉండగా మృతుల సంఖ్య 48,895గా ఉంది. కేంద్ర ప్రభుత్వ మార్గదర్శకాల మేరకు మరో 229 మరణాలను ఈ జాబితాలో చేర్చినట్లు అధికారులు వెల్లడించారు.
- కర్ణాటకలో కొత్తగా 4246 కొవిడ్ కేసులు బయటపడ్డాయి. ఇద్దరు ప్రాణాలు కోల్పోయారు. ఒక్క బెంగళూరులోనే 3605 మందికి కరోనా సోకింది. పాజిటివిటీ రేటు 3.33 శాతంగా ఉంది. మరోవైపు కొత్తగా నమోదైన ఒమిక్రాన్ కేసుల సంఖ్య 226గా ఉంది.
- బిహార్లో 1659 కేసులు బయటపడ్డాయి. గత ఆరు నెలలలో ఈ స్థాయిలో రాష్ట్రంలో కేసులు నమోదు కావడం ఇదే తొలిసారి. యాక్టివ్ కేసుల సంఖ్య 3వేలు దాటింది. ఇప్పటివరకు రాష్ట్రంలో 13,786 మరణాలు నమోదైనట్లు అధికారులు వెల్లడించారు.
ఇదీ చూడండి : '8 రోజుల్లోనే 6.3 రెట్లు పెరిగిన కరోనా కేసులు'
