కరోనా వ్యాప్తి నియంత్రణలో పాలనా యంత్రాంగానికి సాయం చేయాలని సైన్యానికి సూచించారు రక్షణమంత్రి రాజ్నాథ్ సింగ్. దేశంలో కొవిడ్ కేసులు భారీగా పెరుగుతున్న వేళ.. సైన్యం తన సేవలను విస్తరించాలన్నారు. సైనిక ఆసుపత్రులు అందుబాటులో ఉన్న ప్రాంతాల్లో కొవిడ్ రోగులకు చికిత్స అందించాలని సూచించారు.
కరోనా బాధితులు ఎక్కువగా ఉన్న రాష్ట్రాల్లో పరిస్థితుల ఆధారంగా ప్రభుత్వాధికారులతో సంప్రదింపులు జరిపి.. తగిన సహాయం అందించాలన్నారు. కరోనా నియంత్రణకు తమ వంతు సాయం చేయడానికి సిద్ధంగా ఉండాలని ఆ మంత్రిత్వ శాఖలోని ఉన్నతాధికారులు, త్రివిద ధళాల అధిపతులు సహా డీఆర్డీఓ అధికారులకు సూచించారు.
దీనిపై సైన్యాధిపతి ఎంఎం నరవాణె స్పందించినట్లు అధికార వర్గాలు తెలిపాయి. తమకు అవకాశం ఉన్న చోట కొవిడ్ బాధితులకు చికిత్స అందించే వెసులుబాటు కల్పించడానికి నరవాణె యోచిస్తున్నారని వెల్లడించాయి. అలాగే పాలనా యంత్రాంగానికి అన్నివిధాలా సాయం చేస్తామని చెప్పారని పేర్కొన్నాయి.
ఇదీ చూడండి: మూడో దశ క్లినికల్ ట్రయల్స్కు జాన్సన్ దరఖాస్తు
