రాష్ట్రంలో కరోనా కేసులు పెరుగుతున్న తరుణంలో కీలక నిర్ణయం తీసుకుంది ఛత్తీస్గఢ్ ప్రభుత్వం. కొత్త అసెంబ్లీ భవన నిర్మాణానికి ఆహ్వానించిన టెండర్లను రద్దు చేసింది. రాష్ట్రంలోని ప్రధాన ప్రాజెక్టుల పనులను నిలిపివేసింది. కరోనా కట్టడిపైనే ప్రత్యేక దృష్టి సారించినట్లు తెలిపింది.
నయా రాయ్పుర్లో నిర్మించ తలపెట్టిన గవర్నర్ హౌస్, అసెంబ్లీ హౌస్, ముఖ్యమంత్రి, మంత్రులు, సీనియర్ అధికారుల నివాసాలు, న్యూ సర్క్యూట్ హౌస్ పనులు నిలిపివేసినట్లు ఓ ప్రకటన చేసింది రాష్ట్ర ప్రభుత్వం. ఈ ప్రాజెక్టుల పనులకు 2019 నవంబర్ 25న భూమి పూజ చేశారు.
" ప్రజలే మా తొలి ప్రాధాన్యం. కరోనా ప్రారంభానికి ముందు అసెంబ్లీ భవనం, రాజ్ భవన్, సీఎం నివాసం వంటి ప్రాజెక్టులకు శంకుస్థాపన చేశాం. ప్రస్తుత సంక్షోభ సమయంలో ఆయా ప్రాజెక్టులను నిలిపివేస్తున్నాం. "
- భూపేశ్ బఘేల్, ఛత్తీస్గఢ్ ముఖ్యమంత్రి
నిర్మాణ పనులను తక్షణమే నిలిపివేయాలని ప్రజా పనుల విభాగం ఇంజినీరు సంబంధిత సంస్థలకు ఆదేశాలు జారీ చేసినట్లు ప్రకటనలో తెలిపింది రాష్ట్ర ప్రభుత్వం. సెక్టార్-19లో కొత్త అసెంబ్లీ భవన నిర్మాణానికి రూ.245.16 కోట్లు, రూ.118 కోట్లు విలువైన రెండు ప్రాజెక్టులకు పిలిచిన టెండర్లను రద్దు చేస్తున్నట్లు పేర్కొంది.
సెంట్రల్ విస్టా నిర్మాణ పనులను కొనసాగించటంపై విపక్షాలు విమర్శలు గుప్పించాయి. ఈ క్రమంలో ఛత్తీస్గఢ్ ప్రభుత్వం చేపట్టిన అసెంబ్లీ, ఇతర ప్రాజెక్టుల నిర్మాణంపై భాజపా ఎదురుదాడికి దిగింది. ఈ క్రమంలో టెండర్లు రద్దు చేసి గట్టి సమాధానమిచ్చింది రాష్ట్ర ప్రభుత్వం.
ఇదీ చూడండి: ఐదు నెలల్లో 216 కోట్ల టీకా డోసులు రెడీ!
