భాజపా, కాంగ్రెస్ మధ్య 'టూల్కిట్' వివాదానికి దారితీసింది. కేంద్ర ప్రభుత్వ పాలనపై వివాదాస్పద వ్యాఖ్యలు చేస్తూ కాంగ్రెస్ టూల్కిట్ రూపొందించిందని భాజపా నేతలు ఆరోపించారు. ఈ మేరకు పలు డాక్యుమెంట్లను సామాజిక మాధ్యమాల్లో షేర్ చేశారు. భారత్, ప్రధాని నరేంద్ర మోదీ ప్రతిష్ఠకు భంగం కలిగించేందుకు కాంగ్రెస్ కుట్ర పన్నుతోందని భాజపా నేతలు దుయ్యబట్టారు.
ఇంతకీ వివాదం ఏంటి?
భాజపా ప్రభుత్వానికి, ప్రధాని మోదీకి వ్యతిరేకంగా కార్యకర్తలు చేపట్టాల్సిన చర్యలను వివరిస్తూ ఉన్న డాక్యుమెంట్లు సామాజిక మాధ్యమాల్లో వెలుగుచూశాయి. కాంగ్రెస్ గుర్తుతో ఉన్న ఆ పత్రాలను భాజపా ప్రతినిధి సంబిత్ పాత్రా సహా పలువురు నేతలు తమ సోషల్ మీడియాలో షేర్ చేశారు. ప్రస్తుతం వ్యాపిస్తున్న కరోనా కొత్త స్ట్రెయిన్ను కార్యకర్తలు 'ఇండియన్ స్ట్రెయిన్' అని కాకుండా 'మోదీ స్ట్రెయిన్' అని పిలవాలని ఆ పత్రాల్లో ఉన్నట్లు భాజపా పేర్కొంది. వీటితో పాటు సెంట్రల్ విస్టా ప్రాజెక్టు, కొవిడ్ మరణాలపైనా వివాదాస్పద వ్యాఖ్యలు ఉన్నట్లు చెప్పింది భాజపా.
"రాజకీయ లబ్ధి కోసం విదేశీ జర్నలిస్టుల సాయంతో దేశ ప్రతిష్ఠను దెబ్బతీయడానికి కాంగ్రెస్ ఏ అవకాశాన్ని వదులుకోవట్లేదు. ఈ మహమ్మారిని రాహుల్ గాంధీ ప్రధాని ప్రతిష్ఠను దెబ్బతీసేందుకు అవకాశంగా భావిస్తున్నారు. కుంభమేళాను సూపర్ స్ప్రెడర్ కుంభ్గా పిలవమని ఆ పార్టీ పేర్కొంది. కాంగ్రెస్ అజెండా ఏంటో మీరే తెలుసుకోండి. "
-సంబిత్ పాత్రా, భాజపా ప్రతినిధి
కాంగ్రెస్ ఖండన
భాజపా ఆరోపణలను కాంగ్రెస్ ఖండించింది. కొవిడ్ కట్టడి వైఫల్యంపై భాజపా నకిలీ టూల్కిట్ను రూపొందించి, తమకు ఆపాదిస్తోందని కాంగ్రెస్ ప్రతినిధి రాజీవ్ గౌడ పేర్కొన్నారు. ఈ చర్యలను వ్యతిరేకిస్తూ ఫోర్జరీకి పాల్పడినందుకు గానూ భాజపా అధ్యక్షుడు జేపీ నడ్డా, సంబిత్ పాత్రాపై ఎఫ్ఐఆర్ దాఖలు చేస్తామని తెలిపారు. దేశమంతా కొవిడ్తో అతలాకుతులం అవుతుంటే భాజపా మాత్రం ఫోర్జరీలకు పాల్పడుతోందని ఆరోపించారు.
ఇదీ చదవండి : 'చిన్నారుల కోసమైనా మోదీ ప్రభుత్వం నిద్రలేవాలి'
