'భారత​ వ్యవహారాల్లో విదేశీ జోక్యం బాధాకరం'

భారత​ అంతర్గత వ్యవహారాల్లో విదేశీ జోక్యాన్ని కేంద్రం అనుమతిస్తుందని ఆరోపించింది కాంగ్రెస్​. భారత్​-పాకిస్థాన్​ల మధ్య చర్చలు జరిపేందుకు యూఏఈ​ మధ్యవర్తిగా వ్యవహరించనున్నట్లు పాక్​ చెబుతోంది. ఈ క్రమంలో కేంద్రంపై విమర్శలు గుప్పించారు కాంగ్రెస్​ నేత మల్లికార్జున ఖర్గే.

భారత్​-పాకిస్థాన్​ల మధ్య తిరిగి చర్చలు జరపడానికి మధ్యవర్తిలా వ్యవహరించేందుకు యునైటెడ్​ అరబ్​ ఎమిరేట్స్(యూఏఈ) ముందుకొస్తుందని పాక్​ చెబుతోంది. ఈ నేపథ్యంలో భారత్ అంతర్గత వ్యవహారాల్లో విదేశీ జోక్యాన్ని అనుమతిస్తుందనే ఉద్దేశంతో కేంద్రంపై విమర్శలతో విరుచుకుపడ్డారు కాంగ్రెస్ నేత మల్లికార్జున ఖర్గే​.

"భారత్​-పాక్ ​మధ్య మధ్యవర్తిత్వం వహిస్తామని యూఏఈ దౌత్యవేత్త చెప్పినట్లు వార్తలు వస్తున్నాయి. అయితే విదేశీ మధ్యవర్తిత్వాన్ని నివారించడానికి, ఇరుదేశాల మధ్య మధ్యవర్తులు రాకుండా ఉండటానికి.. 1972లో సిమ్లా ఒప్పందం జరిగింది. ఇది భారత్​ దౌత్య విజయాల్లో ఒకటి. అయితే ఇప్పుడు భారత్​-పాక్​ మధ్య ఇతరులు జోక్యం చేసుకోవడమే కాదు.. కశ్మీర్ సమస్య కూడా అంతర్జాతీయ అంశంగా మారింది. భాజపా నేతృత్వంలోని కేంద్రం ఇలా చేయడం బాధాకరం."

- మల్లికార్జున ఖర్గే, కాంగ్రెస్​ నేత

భారత ప్రభుత్వం కారణాలు వెతుకుతుందని.. ఇటువంటి ప్రయత్నాలు మానుకోవాలని సూచించారు ఖర్గే.

అదేం లేదు..

భారత్​-పాక్​ల మధ్య యూఏఈ జోక్యం చేసుకుంటుందని.. వచ్చిన వార్తలను తోసిపుచ్చారు పాకిస్థాన్​ మాజీ రాయబారి, భారత హైకమిషనర్​​ జీ పార్థసారథి. 'మూడో వ్యక్తి మధ్యవర్తిత్వం వహించడాన్ని భారత్​.. ఎప్పుడూ అంగీకరించదు. ఈ విషయంలో భారత్​ చాలా స్పష్టంగా ఉంది. ఇటువంటి సమస్యలను సిద్ధాంతాల ప్రకారం.. ద్వైపాక్షిక చర్చల ద్వారానే పరిష్కరించుకుంటుంది' అని పార్థసారథి స్పష్టం చేశారు. విదేశీ విధానంలో ప్రతి దేశం గొప్ప పేరు కోసం ప్రయత్నిస్తుందన్నారు. అయితే యూఏఈతో భారత్​కు మంచి సంబంధాలున్నాయని పేర్కొన్నారు.

ఇదీ చూడండి: మూడో దశ క్లినికల్ ట్రయల్స్​కు జాన్సన్​ దరఖాస్తు