కాంగ్రెస్ కీలక నేత గులాం నబీ ఆజాద్ సోదరుడి కుమారుడు ముబాశిర్ ఆజాద్.. భాజపాలో చేరారు. జమ్ముకశ్మీర్ భాజపా అధ్యక్షుడు రవీందర్ రైనా, ఇతర సీనియర్ నాయకుల సమక్షంలో ముబాశిర్తో పాటు ఆయన మద్దతుదారులు కాషాయ కండువా కప్పుకున్నారు. ఈ సందర్భంగా మాట్లాడిన ఆయన.. 'క్షేత్రస్థాయిలో ప్రధాని నరేంద్ర మోదీ చేపట్టిన అభివృద్ధి కార్యకలాపాలు నన్ను ఎంతగానో ప్రభావితం చేశాయి. అందుకే భాజపాలో చేరాను' అని వెల్లడించారు.
ఆజాద్ తమ్ముడి కుమారుడైన ముబాశిర్.. 'కాంగ్రెస్ అదిష్ఠానం మా పెదనాన్నను అగౌరవపరిచింది. అది నన్ను బాధించింది. ఆ పార్టీ నుంచి విడిపోయేలా చేసింది' అని పేర్కొన్నారు. అయితే భాజపాలో చేరే విషయం గురించి గులాం నబీ ఆజాద్తో చర్చించలేదని తెలిపారు. కాంగ్రెస్ పార్టీ అంతర్గత పోరులో కూరుకుపోయిందని.. మోదీ నాయకత్వంలో ప్రజల సంక్షేమం కోసం పనులు జరుగుతున్నాయని అన్నారు.
"పార్టీ ప్రజాకర్షక నేతల్లో ఒకరైన, మాజీ ముఖ్యమంత్రి (గులాం నబీ) ఆజాద్తో కాంగ్రెస్ వ్యవహరించిన తీరు సామాన్య ప్రజల మనోభావాలను దెబ్బతీసింది. దేశానికి సేవ చేసిన ఆయనను పార్లమెంట్లో ప్రధాని మోదీ ప్రశంసించారు. అయితే కాంగ్రెస్ పార్టీనే పక్కన పెట్టింది" అని ముబాశిర్ వ్యాఖ్యానించారు.
గతేడాది కాంగ్రెస్ పార్టీ నాయకత్వం, సంస్థాగత నిర్మాణంలో మార్పు అవసరమంటూ ఎత్తిచూపిన 23 మంది (జీ23) నేతల్లో ఆజాద్ కూడా ఉన్నారు. ఈ పరిణామాల తర్వాత ఆజాద్‌పై ప్రధాని మోదీ ప్రశంసలు కురిపించడం, ఆజాద్‌కు కేంద్రం పద్మభూషణ్‌ అవార్డు ప్రకటించడం కాంగ్రెస్కు మింగుడుపడని చర్యలుగా రాజకీయ విశ్లేషకులు అభిప్రాయపడుతున్నారు.
ఇదీ చూడండి: యూపీ ఐదో దశ ఎన్నికలు ప్రశాంతం- 54% ఓటింగ్!
