BRS Office in Delhi: తెలంగాణ ప్రత్యేక రాష్ట్ర ఏర్పాటే లక్ష్యంగా ఆవిర్భవించి.. ఇటీవల జాతీయ పార్టీగా మారిన గులాబీపార్టీ ప్రస్థానంలో మరో కీలక ఘట్టం ఆవిష్కృతమైంది. దేశ రాజధాని దిల్లీలో నిర్మించిన బీఆర్ఎస్ నూతన కార్యాలయాన్ని పార్టీ అధినేత చంద్రశేఖరరావు ప్రారంభించారు. మధ్యాహ్నాం ఒంటి గంటా 5 నిమిషాలకు.. కేసీఆర్ చేతుల మీదుగా ఈ ప్రారంభోత్సవ కార్యక్రమం జరిగింది. వేదపండితులు ఉదయం సుదర్శన హోమం, వాస్తు పూజలు నిర్వహించారు. మంత్రి ప్రశాంత్ రెడ్డి, ఎంపీ సంతోష్‌తోపాటు పార్టీ నేతలు ఈ పూజల్లో పాల్గొన్నారు.
పార్టీ కార్యాలయాన్ని ప్రారంభించిన సీఎం కేసీఆర్: ఉదయం హైదరాబాద్ నుంచి ప్రత్యేక విమానంలో ముఖ్యమంత్రి దిల్లీకి చేరుకున్నారు. ఆయనకు దిల్లీలో ఉన్న నేతలు ఘనస్వాగతం పలికారు. పార్టీ కార్యాలయం ప్రారంభోత్సవం అనంతరం.. తన ఛాంబర్లో సీఎం కేసీఆర్ ఆసీనులయ్యారు. కార్యక్రమంలో పార్టీ సెక్రటరీ జనరల్, రాజ్యసభ సభ్యుడు కేకే, మంత్రులు, ఎంపీలు, పలువురు ఎమ్మెల్యేలు, బీఆర్ఎస్ నేతలు పాల్గొన్నారు.
1500 గజాల స్థలంలో 3 అంతస్తుల భవనం నిర్మాణం: దిల్లీ వసంత్ విహార్లోని 100మీటర్ల స్థలంలో 4 అంతస్తులతో 11వేల చదరపు అడుగుల స్థలంలో పార్టీ కార్యాలయాన్ని నిర్మించారు. అధ్యక్షుడి కోసం.. ప్రత్యేకంగా ఒక క్యాబిన్, అతిథుల కోసం రెండు ప్రత్యేక సూట్స్, ప్రధాన కార్యదర్శుల కోసం 4 ఛాంబర్లు నిర్మించారు. భవనం మొదటి అంతస్తులో అధ్యక్షుడి ఛాంబర్, ఇతర ఛాంబర్స్, కాన్ఫరెన్స్ హాల్ ఏర్పాటు చేసిన పార్టీ నేతలు.. 2, 3 అంతస్తుల్లో మొత్తం 18 రూములు నిర్మించారు. పార్టీ కార్యాలయానికి వచ్చే వారి భోజన అవసరాలకు.. ప్రత్యేకంగా క్యాంటిన్ ఏర్పాటుకు స్థలం కేటాయించారు. అనంతరం సీఎం కేసీఆర్ దిల్లీ నుంచి బయలుదేరి హైదరాబాద్కు చేరుకున్నారు.
నాడు జలదృశ్యం.. నేడు దిల్లీలో అద్వితీయ దృశ్యం: దిల్లీలో బీఆర్ఎస్ కార్యాలయ ప్రారంభోత్సవం సందర్భంగా పార్టీ శ్రేణులకు మంత్రి కేటీఆర్ శుభాకాంక్షలు తెలిపారు. నాడు జలదృశ్యం.. నేడు దిల్లీలో అద్వితీయ దృశ్యం అని కేటీఆర్ పేర్కొన్నారు. పార్టీ శ్రేణులతో పాటు రాష్ట్ర ప్రజలందరికీ గర్వకారణమన్న ఆయన.. బీఆర్ఎస్ జాతీయ ప్రస్థానం.. నేడు ఒక చారిత్రక అవసరమని కేటీఆర్ వ్యాఖ్యానించారు. బంగారు తెలంగాణ మోడల్‌పైనే ప్రస్తుతం దేశవ్యాప్తంగా చర్చ నడుస్తోందని ఐటీ శాఖ మంత్రి కేటీఆర్ అన్నారు.
ఇవీ చదవండి:
