చిన్న వయసులోనే ఈ-సైకిల్ తయారు చేయాలని కలలు కన్నాడు. అయితే ఈ-సైకిల్ చేసినప్పటికీ.. దాని స్పీడ్ను అదుపు చేయడంలో విఫలయ్యాడు. ఫలితంగా ఓ కారును ఢీకొట్టి ప్రమాదానికి గురయ్యాడు. రెట్టించిన ఉత్సాహంతో ముందుకెళ్లి.. 'ఈ-బైక్' తయారు చేయడంలో సఫలమయ్యాడు దిల్లీకి చెందిన 9వ తరగతి విద్యార్థి రాజన్. పాడైపోయిన రాయల్ ఎన్ ఫీల్డ్ మోటార్ సైకిల్ విడిభాగాలను పోగు చేసి ఈ-బైక్ను తయారు చేయడం గమనార్హం. చిట్టి చేతులతోనే అద్భుతాన్ని చేసి చూపించాడు రాజన్.
సుభాష్ నగర్లోని సర్వోదయ బాల్ విద్యాలయలో చదువుతున్న రాజన్.. మూడు రోజుల్లోనే ఈ-బైక్ తయారు చేసి అందర్నీ ఆశ్చర్యంలోకి నెట్టేశాడు. మూడు నెలల పాటు పాడైపోయిన ఎన్ఫీల్డ్ భాగాలను సేకరించి.. అతి తక్కువ వ్యయంతో ఈ-బైక్ను తయారు చేయగలిగాడు.
"బైక్ తయారీకి సంబంధించిన వస్తువులను సేకరించడానికి మూడు నెలలు పట్టింది. తర్వాత మూడు రోజుల్లో ఈ బైక్ తయారు చేశా. లాక్డౌన్ మొదలయ్యాక స్కూల్ ఉండేది కాదు. ఆ సమయంలో నేను బైక్ షాపులో సమయం గడిపేవాడిని. మా ఇంటి సమీపంలో ఓ మోటార్ రిపేర్ షాపు ఉంది. ఆ షాపు యజమానిని.. ఆర్పీఎమ్ స్పీడ్ వంటి విషయాలు అడిగి తెలుసుకున్నాను. బైక్ మోటార్కు ఎంత ఆర్పీఎమ్ స్పీడ్ అవసరమో అంచనా వేశాను. తర్వాత నాన్నకు మోటార్ కొనమని చెప్పాను."
--రాజన్, విద్యార్థి.
ఈ ఈ-బైక్ తయారు చేయడానికి రూ. 45 వేలు ఖర్చు చేసినట్లు రాజన్ తెలిపాడు. తొలుత.. ఈ-బైక్ తయారు చేయగలననే విశ్వాసం తన తండ్రికి ఉండేది కాదని రాజన్ పేర్కొన్నాడు. కానీ, రాజన్ తల్లి మాత్రం అతనిపై పూర్తి నమ్మకం ఉంచేదని అన్నాడు.
