మహారాష్ట్రలో ఓ జిల్లా కలెక్టరేట్లోని చరాస్తులను జప్తు చేయాలంటూ కోర్టు ఆదేశాలు జారీ చేసింది. దాదాపు 40 ఏళ్ల నాటి ఓ భూ వివాదం కేసులో బాధితుడికి నష్ట పరిహారం విషయంలో జాప్యం చేసినందుకు గాను కోర్టు ఈ నిర్ణయం తీసుకుంది. దీంతో కలెక్టరేట్లో ఉన్న కారు, కుర్చీ, టేబుల్ వంటి వస్తువులను జప్తు చేయాలని ఆదేశించింది. 2017లో రోడ్డు పనుల్లో భాగంగా తన భూమిని కోల్పోయిన ఓ వ్యక్తి పిటిషన్ మేరకు.. కలెక్టరేట్ ఆస్తులను అమ్మి బాధితుడికి నష్ట పరిహారం చెల్లించాలని కోర్టు ఆదేశించింది.
అసలేంటా కేసు?
కొల్హాపుర్ జిల్లాలోని కురుంద్వాడ్ మున్సిపాలిటీలో అభివృద్ధి పనులు చేయడానికి 1984లో అక్కడ ప్రభుత్వం నిర్ణయం తీసుకుంది. దీనిలో భాగంగా కురుంద్వాడ్లో 60 మీటర్ల వెడల్పుతో రోడ్డు పనులు ప్రారంభించింది. అయితే రోడ్డు పనుల్లో వసంత్ రాజారామ్ సంక్పాల్ అనే వ్యక్తి 1984లో కొంత భూమిని కోల్పోయాడు. దీంతో వసంత్ రాజారామ్ ఆ రోడ్డు పనులు ప్రభుత్వం ఆదేశాల మేరకు జరుగుతున్నాయే లేదో తెలుసుకునేందుకు.. స్థానిక మున్సిపల్ కౌన్సిలర్ను అడిగాడు. ఈ విషయంలో మున్సిపల్ కౌన్సిలర్కు, వసంత్ రాజారామ్కు మధ్య వివాదం చెలరేగింది. ఈ వివాదం కాస్త పెద్దదై బాంబే హైకోర్టు వరకు వెళ్లింది. అయితే, మున్సిపల్ కౌన్సిల్ ఆమోదించిన ప్లాన్ ప్రకారమే రోడ్డు పనులు జరిగాయా లేదా, ఆ పనుల్లో భాగంగానే వసంత్ రాజారామ్ భూమిని కోల్పోవాల్సి వచ్చిందా లేదా అన్న విషయాన్ని సివిల్ కోర్టు తేల్చి చెప్పాలని బాంబే హైకోర్టు 2017 జూలై 31న ఆదేశించింది.
దీని ప్రకారం వసంత్ రాజారామ్ 2018లో సివిల్ కోర్టులో దావా వేశారు. ఆ కేసు విచారణ చేపట్టిన సివిల్ కోర్టు.. ప్రభుత్వ ఆదేశాల మేరకు కురుంద్వాడ్లో రోడ్డు పనులు జరిగినట్లు కోర్టు తెల్చి చెప్పింది. ప్రస్తుతం వివాదంలో ఉన్న వసంత్ రాజారామ్ భూమి కూడా రోడ్డు పనుల్లో భాగంగానే కోల్పోవాల్సి వచ్చినట్లు తెలిపింది. అయితే భూమిని కోల్పోయిన వసంత్ రాజారామ్కు మూడు నెలల్లోగా నష్టపరిహారం చెల్లించాలని కొల్హాపుర్ కలెక్టర్, స్పెషల్ అక్విజేషన్ ఆఫీసర్కు 2019 జూన్ 27న సివిల్ కోర్టు ఆదేశాలు జారీ చేసింది.
అయితే దాదాపు సంవత్సరం గడిచినా సంబంధిత అధికారులు వసంత్ రాజారామ్కు ఎటువంటి నష్టపరిహారం చెల్లించలేదు. దీంతో వసంత్ రాజారామ్ మళ్లీ సివిల్ కోర్టును ఆశ్రయించారు. కోర్టులో పిటిషన్ వేసినప్పటికీ కలెక్టర్, సంబంధిత అధికాలను నుంచి ఎటువంటి స్పందన లేదు. దీంతో కొల్హాపుర్ కలెక్టర్ కార్యాలయంలోని చరాస్తులను జప్తు చేయాలని డిమాండ్ చేస్తూ 2023 జనవరి 5న కోర్టుకు దరఖాస్తు చేశారు వసంత్ రాజారామ్. దీనిపై విచారించిన కోర్టు ఫిబ్రవరి 16న కొల్హాపుర్ కలెక్టర్, స్పెషల్ అక్విజేషన్ ఆఫీసర్ కార్యాలయాలకు సంబంధించిన చరాస్తులను జప్తు చేయాలని ఆదేశించింది. దీనిలో భాగంగా రూ.3 లక్షల విలువైన కలెక్టర్ కారు, రూ.20,000 విలువ చేసే కుర్చీ, రూ.20,000 విలువ చేసే టేబుల్, అల్మారా, ఫ్యాన్, కూలర్ వంటి ఆస్తులను జప్తు చేయాలంటూ తీర్పునిచ్చింది.
