టీచర్ కర్కశం.. స్పృహ తప్పిపోయేలా విద్యార్థిని చితకబాది..

విద్యార్థి బాగా చదవకపోతే టీచర్​ మందలిస్తారు. కానీ ఓ ట్యూషన్​ టీచర్​ మాత్రం ఏకంగా విద్యార్థి స్పృహ కోల్పోయినట్లు చితకబాదాడు. విద్యార్థి ప్రాధేయపడినా ఉపాధ్యాయుడు కనికరించలేదు. ఈ ఘటన బిహార్​లో జరిగింది.

బిహార్​లో దారుణం జరిగింది. సరిగ్గా చదవట్లేదని ట్యూషన్​కు వచ్చిన 5 ఏళ్ల బాలుడిపై టీచర్ విచక్షణారహితంగా దాడికి పాల్పడ్డాడు. కర్రతో కొడుతూ, కాలితో తన్నాడు. బాలుడు కొట్టొద్దని ఎంత ప్రాధేయపడినా వినలేదు. ఆఖరికి విద్యార్థి స్పృహ తప్పి కింద పడిపోయాడు. తీవ్ర గాయాలైన బాలుడిని ఆసుపత్రికి తరలించాడు. ఈ ఘటన పట్నా, వీర్​ ఒరియా ప్రాంతంలోని జయ కోచింగ్ సెంటర్​లో జరిగింది. నిందితుడు ఛోటూపై పోలీసులు కేసు నమోదు చేసుకున్నారు. చిన్నారిపై దాడికి పాల్పడిన అతడిపై కఠిన చర్యలు తీసుకుంటామని పోలీసులు తెలిపారు.

బాలుడు అపస్మారక స్థితిలోకి వెళ్లాడన్న విషయం తెలుసుకున్న గ్రామస్థులు.. ఉపాధ్యాయుడు ఛోటూపై ఆగ్రహం వ్యక్తం చేశారు. నిందితుడిని చిదకబాదారు. ఈ దాడిలో అతడికి తీవ్ర గాయాలయ్యాయి. వెంటనే ఆసుపత్రికి తరలించారు. ఈ విషయం తెలుసుకున్న జయ కోచింగ్ ఇన్​స్టిట్యూట్​లో చదువుతున్న విద్యార్థుల తల్లిదండ్రులు భయాందోళనలకు లోనయ్యారు.

"టీచర్‌కు అధిక రక్తపోటు సమస్య ఉంది. అందుకే అతను విద్యార్థి పట్ల అలా ప్రవర్తించాడు. అతడు చేసింది చాలా తప్పు. ఉపాధ్యాయుడు ఛోటూను ఇన్​స్టిట్యూట్​ నుంచి తొలగిస్తున్నాం. గామస్థుల దాడిలో నిందితుడు ఛోటూ తీవ్రంగా గాయపడి ఆసుపత్రిలో చికిత్స పొందుతున్నాడు."
-వికాస్​ కుమార్​, జయ కోచింగ్ ఇన్​స్టిట్యూట్ ప్రిన్సిపల్

ఇదీ చదవండి: 'ఐదు రూపాయల డాక్టర్​'.. పెద్దాసుపత్రిలో నయంకాని రోగాలూ మాయం!