'వ్యాక్సినేషన్​లో ఆ రాష్ట్రాలు మెరుగుపడాలి'

కొవిడ్ టీకా పంపిణీ విషయంలో మహారాష్ట్ర, దిల్లీ, పంజాబ్​లు వెనకంజలో ఉన్నాయని కేంద్రం పేర్కొంది. ఈ మేరకు ఆయా ప్రభుత్వాలకు లేఖ రాసింది. ఈ విషయంలో దిద్దుబాటు చర్యలు చేపట్టాలని సూచించింది.

వైద్య సిబ్బంది సహా అర్హులైవారికి వ్యాక్సిన్ అందించే విషయంలో వెనకంజలో ఉన్నాయని పేర్కొంటూ.. దిల్లీ, మహారాష్ట్ర, పంజాబ్​ ప్రభుత్వాలకు లేఖ రాసింది కేంద్రం. వ్యాక్సినేషన్ విషయంలో ఈ రాష్ట్రాల పనితీరు జాతీయ సగటు కంటే తక్కువగా ఉందని తెలిపింది.

ఈ మేరకు ఆయా ప్రభుత్వాల ప్రధాన కార్యదర్శులకు లేఖ రాసిన కేంద్ర ఆరోగ్య శాఖ అదనపు కార్శదర్శి మనోహర్​ అజ్ఞాని.. కరోనా వ్యాక్సినేషన్​ డ్రైవ్​ పనితీరును మెరుగుపరిచే దిశగా తక్షణమే దిద్దుబాటు చర్యలు చేపట్టాలని సూచించారు.

కొవిడ్​ టీకా కొరతపై మహరాష్ట్ర సహా ఇతర రాష్ట్రాల ఆరోపణలపై కేంద్ర ఆరోగ్యమంత్రి హర్షవర్ధన్​ తీవ్ర వ్యాఖ్యలు చేసిన నేపథ్యంలో ఈ లేఖ రాయడం ప్రాధాన్యం సంతరించుకుంది.

గిరిజనుల కోసం ..

మరోవైపు, వివిధ వ్యాధులపై గిరిజన ప్రజలకు అవగాహన కల్పించడానికి.. కేంద్ర మంత్రులు డాక్టర్ హర్షవర్ధన్​, కేంద్ర గిరిజన వ్యవహారాల మంత్రి అర్జున్ ముండా సంయుక్తంగా 'అనామయ' కార్యక్రమాన్ని ప్రారంభించారు. దేశంలోని గిరిజన వర్గాల ఆరోగ్య స్థితిగతులను మెరుగుపర్చేందుకు.. ప్రభుత్వాలు, సంస్థలు చేపట్టే చర్యలను ఏకతాటిపైకి తీసుకొచ్చేందుకు 'అనామయ' ఉపయోగపడనుంది.

కరోనా నియంత్రణకు ప్రపంచదేశాలతో..

కొవిడ్​ను కట్టడి కోసం అంతర్జాతీయ సమాజంతో కలిసి భారత్​ పని చేస్తోందన్నారు హర్షవర్ధన్​. దేశంలో కరోనా టీకా పంపిణీ వేగవంతం చేస్తున్నట్లు తెలిపారు. ప్రపంచ ఆరోగ్య దినోత్సవం సందర్భంగా డబ్ల్యూహెచ్​ఓ ఆగ్నేసియా ప్రాంతీయ కార్యాలయాన్ని ఉద్దేశించి మాట్లాడిన ఆయన.. భారత్​లో భారీ స్థాయిలో వ్యాక్సినేషన్​ చేపట్టడమే కాకుండా.. 80 దేశాలకు టీకా సరఫరా చేసినట్లు పేర్కొన్నారు. ప్రపంచ వ్యాప్తంగా టీకా పంపిణీ అసమానతలను తగ్గించడానికి ఇదో పరిష్కారం మార్గం అన్నారు.

ఇదీ చూడండి: 'ప్రజల దృష్టిని మరల్చడానికే 'టీకా కొరత' వ్యాఖ్యలు'