కేంద్ర ప్రభుత్వం నీతి ఆయోగ్‌ను(niti aayog news) పునర్వ్యవస్థీకరించింది. ఈ మేరకు కేంద్ర కేబినెట్ సచివాలయం ఉత్తర్వులు జారీచేసింది. ప్రధాని అధ్యక్షతన పనిచేసే ఈ సంస్థ ఉపాధ్యక్షుడు రాజీవ్కుమార్, పూర్తిస్థాయి సభ్యులు వీకే సారస్వత్‌, రమేష్‌చంద్‌, వీకే పాల్‌లను యథాతథంగా కొనసాగించింది.
ఎక్స్‌అఫీషియో సభ్యులుగా ఇది వరకు కేంద్ర హోం, ఆర్థిక, రైల్వే, వ్యవసాయ, ప్రణాళికా శాఖల సహాయ మంత్రులు ఉండగా, ఇప్పుడు అందులో నుంచి రైల్వే, ప్రణాళికా శాఖల సహాయ మంత్రులను తొలగించింది. కొత్తగా రక్షణ మంత్రి రాజ్‌నాథ్‌ సింగ్‌ను చేర్చింది. ప్రత్యేక ఆహ్వానితుల జాబితాలో ఇదివరకు రహదారి రవాణా, సామాజిక న్యాయం సాధికారత, విద్యాశాఖల మంత్రులు ఉండగా, ఇప్పుడు ఈ జాబితా నుంచి విద్యాశాఖను తొలగించింది. కొత్తగా వాణిజ్య శాఖ, రైల్వేశాఖ మంత్రులను చేర్చింది.
ప్రణాళికా శాఖ సహాయ మంత్రిని ఎక్స్‌అఫీషియో సభ్యుడికి బదులు ప్రత్యేక ఆహ్వానితుడిగా నియమించింది. గత నోటిఫికేషన్లలో ఆయా శాఖల మంత్రులు ఎక్స్‌అఫీషియో, ప్రత్యేక ఆహ్వానితులుగా ఉంటారని పేర్కొనగా, ఈ సారి జారీచేసిన నోటిఫికేషన్‌లో మాత్రం మంత్రుల పేర్లు, వారు నిర్వర్తిస్తున్న శాఖలను పొందుపరిచారు. ఇది వరకు ఎక్స్‌అఫీషియో సభ్యులుగా ఐదు గురు, ప్రత్యేక ఆహ్వానితులుగా ముగ్గురు మంత్రులు ఉండగా, ఇప్పుడు రెండు విభాగాల్లోనూ నలుగురేసి చొప్పున నియమితులయ్యారు.
ఇదీ చదవండి: 'తగిన సాక్ష్యాలు ఉంటేనే అనుమానితులకు సమన్లు'
