ఇంటింటికీ వెళ్లి కరోనా టీకా వేయడం సాధ్యం కాదని, దీనివల్ల మొత్తం టీకా ప్రక్రియే ఆలస్యమవుతుందని సుప్రీం కోర్టుకు కేంద్రం స్పష్టం చేసింది. ఇందుకుగల కారణాలనూ వివరించింది. నిపుణుల సలహా మేరకే కొవిడ్ వ్యాక్సిన్ విధానాన్ని రూపొందించామని పేర్కొంటూ 218 పేజీల ప్రమాణ పత్రాన్ని ఆదివారం రాత్రి సమర్పించింది కేంద్రం. ఇందులో ఈ విషయాలను ప్రస్తావించింది.
ఇంటింటికీ టీకా ఎందుకు కుదరదంటే..
- వ్యాక్సిన్ అందించిన తర్వాత ప్రతి ఒక్కరినీ 30 నిమిషాలపాటు పరిశీలించాల్సి ఉంటుంది. ప్రతి ఇంటి వద్దా అంత సేపు ఉండడడం సాధ్యం కాదు.
- టీకా తీసుకున్నవారు ఎవరైనా అనారోగ్యానికి గురైతే వెంటనే వారికి చికిత్స అందించడానికి అవసరమైన సౌకర్యాలు టీకా సెంటర్లో అందుబాటులో ఉంటాయి. అదే ఇంటి వద్ద అయితే కష్టం.
- ప్రతిసారీ బాక్సులను తెరిచి, మూయడం వల్ల ఉష్ణోగ్రతల్లో మార్పులు వచ్చి టీకా సామర్థ్యం తగ్గుతుంది.
- ఒక వయల్ (సీసా) తెరిస్తే దాన్ని నాలుగు గంటల్లోపు లబ్దిదారులకు అందించాల్సి ఉంటుంది. లేదంటే వృథా అవుతుంది. ఇంటింటికి వెళ్లి వేయడం వల్ల టీకాలు వృథా అవుతాయి.
- టీకా కోసం రిజిష్టర్ చేసుకున్న లబ్ధిదారులతోపాటు, చుట్టుపక్కల వారూ వస్తారు. దానివల్ల సిబ్బందిపై అనవసర ఒత్తిడి పెరుగుతుంది.
- ప్రతి ఇంటికీ వెళ్లడం వల్ల సిబ్బందికి వైరస్ సోకే ప్రమాదం ఉంది.
- కొవిన్ యాప్లో పేర్లు నమోదు చేసుకొనేటప్పుడు వారి పిన్‌కోడ్ ఆధారంగా సమీపంలోని సెంటర్‌ను ఎంచుకొనే వెసులుబాటు కల్పించాం.
కొవాగ్జిన్ నుంచి ఐసీఎంఆర్‌కు 5% రాయల్టీ
కొవాగ్జిన్ టీకాను భారత్ బయోటెక్, ఐసీఎంఆర్ సంస్థలు కలిసి ప్రభుత్వ- ప్రైవేటు భాగస్వామ్య విధానంలో అభివృద్ధి చేసినట్లు కేంద్రం వెల్లడించింది. ఈ రెండు సంస్థల మధ్య కుదిరిన ఒప్పందం ప్రకారం భారత్ బయోటెక్ సంస్థ తన నికర విక్రయాల్లో 5% మొత్తాన్ని రాయల్టీ కింద ఐసీఎంఆర్‌కు ఇవ్వాల్సి ఉంటుందని పేర్కొంది. ఈ వ్యాక్సిన్ తయారీకి సంబంధించిన మేధో సంపత్తి హక్కులను రెండు సంస్థలు పంచుకున్నట్లు తెలిపింది. దీంతోపాటు కొవాగ్జిన్ బాక్సులపై ఐసీఎంఆర్-నేషనల్ ఇన్స్టిట్యూట్ ఆఫ్ వైరాలజీ పేరును ముద్రించడానికి భారత్ బయోటెక్ అంగీకరించినట్లు పేర్కొంది.
ఈ టీకా అభివృద్ధి కోసం భారత్ బయోటెక్కు ఐసీఎంఆర్ ఎలాంటి నిధులు సమకూర్చలేదని కేంద్రం స్పష్టం చేసింది. ఈ టీకా మూడో దశ క్లినికల్ ట్రయల్స్కు మాత్రం ఐసీఎంఆర్ నిధులు ఇచ్చిందని తెలిపింది. 22 చోట్ల 25,800 మందిపై ఈ పరీక్షలు జరిగినట్లు వెల్లడించింది. కొవాగ్జిన్, కొవిషీల్డ్ లపై వివిధ అధ్యయనాల కోసం ఐసీఎంఆర్ రూ.11 కోట్లు ఖర్చు చేసినట్లు వివరించింది.
ఇదీ చూడండి: విదేశాల నుంచి నేరుగా రాష్ట్రాలకు కొవిడ్ సాయం!
