వరుసగా 11వ రోజు పెట్రో ధరలు పెరగిన నేపథ్యంలో కేంద్రంపై కాంగ్రెస్ విమర్శల దాడి చేసింది. ఇంధన ధరలు పెంచడం ద్వారా 2014 నుంచి నరేంద్ర మోదీ ప్రభుత్వం రూ.21.5 లక్షల కోట్లను ఆర్జించిందని ఆరోపించింది. ఈ మేరకు కాంగ్రెస్ అధికార ప్రతినిధి రణదీప్ సూర్జేవాలా ధ్వజమెత్తారు.
2019 మే నెల నుంచి పెట్రోల్పై రూ.15.21, డీజిల్పై రూ.15.33లను ప్రభుత్వం పెంచిందని సుర్జేవాలా తెలిపారు. భాజపాను 'భయంకర్ జన్ లూట్ పార్టీ'గా అభివర్ణించారు.
"2014, మే 26న ముడి చమురు ధర బ్యారెల్కు 108.5 డాలర్లుగా ఉంది. 2021, ఫిబ్రవరి 19న ఈ ధర 63.65డాలర్లుగా ఉంది. అయితే.. 2014 మేలో లీటరు పెట్రోల్ ధర రూ.71.51గా ఉంది. ఇప్పుడు రూ.90.19కి పెరిగింది. ఈ ధరలను బట్టి చూస్తే మడి చమురు ధర 41 శాతం తగ్గినట్లుగా తెలుస్తోంది. కానీ, పెట్రోల్ ధరలను మాత్రం ప్రభుత్వం 26 శాతం పెంచింది."
-- రణదీప్ సుర్జేవాలా, కాంగ్రెస్ అధికార ప్రతినిధి
ఇంధన ధరలపై ఎక్సైజ్ సుంకాన్ని తగ్గించి, 130 కోట్ల మంది పౌరులకు ప్రభుత్వం ఉపశమనం కల్పించాలని రణదీప్ సుర్జేవాలా డిమాండ్ చేశారు.
ఇదీ చదవండి:భాజపా-కాంగ్రెస్ కార్యకర్తల బాహాబాహీ
