ఇటీవల కాలంలో వైద్యులపై దాడులు పెరుగుతున్న నేపథ్యంలో కేంద్రం రాష్ట్రాలకు కీలక ఆదేశాలు జారీ చేసింది. డాక్టర్లపై దాడికి యత్నించిన వారిపైన ఎపిడెమిక్ డిసీజెస్ యాక్ట్ ప్రకారం కేసు నమోదు చేసి చర్యలు తీసుకోవాలని స్పష్టం చేసింది. ప్రస్తుత పరిస్థితుల్లో ఈ తరహా చర్యలు తీసుకోవడం అత్యవసరమని పేర్కొంది.
'దాడికి పాల్పడ్డ వారిపై సంస్థాగత ఎఫ్ఐఆర్లు నమోదు చేయాలి. ఆ కేసులను ఫాస్ట్ట్రాక్ పద్ధతిలో దర్యాప్తు చేపట్టాలి. నిందితులపై అవసరమైతే ఎపిడెమిక్ డిసీజెస్ సవరణ చట్టాన్ని కూడా ఉపయోగించవచ్చు' అని కేంద్ర హోంశాఖ కార్యదర్శి అజయ్ భల్లా పేర్కొన్నారు. సోషల్ మీడియాపై కూడా నిఘా ఉంచాలని.. అభ్యంతకర పోస్టులను కట్టడి చేయాలని సూచించారు. డాక్టర్ల కృషి పట్ల అవగాహన కార్యక్రమం చేపట్టాలని పేర్కొన్నారు.
ఎపిడెమిక్ డిసీజెస్ సవరణ చట్టం, 2020.. ప్రకారం వైద్యులపైన దాడికి పాల్పడ్డవారికి ఐదేళ్ల జైలు శిక్ష సహా రూ.2 లక్షల జరిమానా ఉంటుంది. ఒకవేళ బాధితులకు తీవ్ర గాయాలైతే రూ.5 లక్షల జరిమానా సహా ఏడేళ్ల శిక్ష ఉంటుంది.
ఇదీ చదవండి : మరో ఆరు వారాల్లో థర్డ్ వేవ్ అటాక్!
