బంగారం స్మగ్లింగ్ను చట్టవ్యతిరేక కార్యకలాపాల నిరోధక చట్టం (యూఏపీఏ) కింద 'ఉగ్రవాద చర్య'గా పరిగణించవచ్చా లేదా అనే అంశాన్ని పరిశీలించడానికి సుప్రీంకోర్టు అంగీకరించింది. ఇటీవల యూఏపీఏ చట్టం కింద నమోదు చేసిన ఎఫ్ఐఆర్ను కొట్టివేయాలని దాఖలైన ఓ పిటిషన్ను రాజస్థాన్ హైకోర్టు తిరస్కరించింది. దానిని సవాలు చేస్తూ వేసిన వ్యాజ్యంపై కేంద్రం, జాతీయ దర్యాప్తు సంస్థ(ఎన్ఐఏ)లకు సుప్రీంకోర్టు నోటీసులు జారీ చేసింది.
ఇదీ కేసు..
గతేడాది జులైలో జైపూర్ అంతర్జాతీయ విమానాశ్రయంలో 1.5 కేజీల బంగారం అక్రమంగా తరలిస్తూ పట్టుబడ్డాడు మహ్మద్ అస్లాం. దానిని కస్టమ్స్ అధికారులు స్వాధీనం చేసుకున్న తర్వాత అతడిని జ్యుడిషియల్ కస్టడీకి తరలించారు. అనంతరం ఈ కేసు ఎన్ఐఏకు బదిలీ అయ్యింది.
మారిన ఎఫ్ఐఆర్..
అయితే ఈ కేసును ఎన్ఐఏకు తరలించిన తర్వాత.. దేశ ఆర్థిక భద్రత, ద్రవ్య స్థిరత్వాన్ని దెబ్బతీసే ఉద్దేశంతో బంగారం స్మగ్లింగ్ చేశాడని ఎఫ్ఐఆర్ నమోదు చేసినట్లు పిటిషనర్(అస్లాం) తరపు న్యాయవాది తెలిపారు. పిటిషనర్కు ఉగ్రవాదులతో సంబంధాలు ఉన్నట్లు తేలలేదని, అతడి నేపథ్యం అనుమానాస్పదంగా లేదని చెప్పారు.
యూఏపీఏ కింద ఎన్ఐఏ అరెస్టు, దర్యాప్తు చేయకుండా స్టే కోరుతూ అస్లాం పిటిషన్ దాఖలు చేశాడు. బంగారం అమ్మడం ద్వారా ఉగ్రవాదులకు నిధులు సమకూర్చుతాననే అనుమానంతో ఆ ఎఫ్ఐఆర్ నమోదు చేసినట్లు ఆరోపించాడు. అయితే స్మగ్లింగ్ చేసిన బంగారం ఉగ్ర చర్యలకు నిధులు సమకూర్చడానికేనని రికార్డుల్లో ఎన్ఐఏ పేర్కొనలేదని అస్లాం చెప్పారు. కానీ తనపై నమోదు చేసిన సెక్షన్ 15 మాత్రం.. దేశ ఆర్థిక భద్రతకు హాని కలిగించే ఉద్దేశంతో చేసే పనులను ఉగ్రచర్యలుగా పరిగణిస్తుందని వివరించారు.
ఇదీ చూడండి: బ్రిటన్ రాయబారికి భారత విదేశాంగ శాఖ సమన్లు
