పౌరసత్వ సవరణ చట్టానికి వ్యతిరేకంగా చేపట్టిన ఆందోళనల్లో పాల్గొన్నవారిపై నమోదైన కేసులు ఎత్తివేయనున్నట్టు తమిళనాడు ముఖ్యమంత్రి పళనిస్వామి ప్రకటించారు. అదేసమయంలో.. కరోనా లాక్డౌన్ నిబంధనల ఉల్లంఘనలకు సంబంధించి దాదాపు 10లక్షల కేసులు ఎత్తివేయనున్నట్టు తెలిపారు. లాక్డౌన్ సమయంలో పోలీసు విధులకు ఆటంకం కలిగించడంతో పాటు అక్రమ మార్గంలో ఈ-పాస్ పొందిన కేసులు మినహా మిగతావాటిని ఎత్తివేయనున్నట్టు పళనిస్వామి వివరించారు. కడయనల్లూరులోని ఎన్నికల ప్రచార సభలో ఈ మేరకు ప్రస్తావించారు.
సీఏఏ కేసులు రద్దు..
పౌరసత్వ సవరణ చట్టం(సీఏఏ)కు వ్యతిరేకంగా నిర్వహించిన ఆందోళనల్లో ప్రజా ఆస్తుల ధ్వంసం, నిబంధనల ఉల్లంఘన, పోలీసు విధులకు ఆటంకం కలిగించారన్న అభియోగాలపై దాదాపు 1500 మందిపై కేసులు నమోదయ్యాయి. లాక్డౌన్ నిబంధనల ఉల్లంఘన సహా.. కరోనా వ్యాధిపై అసత్య వార్తలను ప్రచారం చేసిన వారిపై అప్పట్లో పోలీసులు కేసులు నమోదు చేశారు.
10లక్షల మందికి విముక్తి..
తాము తీసుకున్న ఈ నిర్ణయంతో.. సుమారు 10లక్షల మందికి కేసుల నుంచి విముక్తి కలుగనుందన్నారు పళనిస్వామి. హింసకు సంబంధించిన కేసులు తప్ప ఇతర కేసుల్లో ప్రజా సంక్షేమాన్ని దృష్టిలో ఉంచుకుని ఈ నిర్ణయం తీసుకున్నట్టు ఉద్ఘాటించారు. కూడంకుళం అణు విద్యుత్ ప్రాజెక్టును వ్యతిరేకించిన వారిపై నమోదైన అనేక కేసులను సైతం ఉపసంహరించామని గుర్తుచేశారు.
ఇవీ చదవండి: 'చిన్నమ్మ వస్తే తమిళనాడులో అల్లర్లే'
చిన్నమ్మ దారెటు? పార్టీపై పెత్తనం సాధ్యమా?
