మూడు రోజులుగా కురుస్తున్న భారీ వర్షాలకు కేరళ గజగజలాడుతోంది. అనేక ప్రాంతాల్లో వరుణుడు బీభత్సం సృష్టిస్తున్నాడు. ఎడతెరిపి లేకుండా కురుస్తున్న వర్షాలకు వేరువేరు ప్రాంతాల్లో కొండచరియలు విరిగిపడుతున్నాయి. అయినా... ముందుగా నిర్ణయించిన ముహూర్తానికే పెళ్లి చేసుకోవాలని సంకల్పించింది ఓ జంట. రోడ్డుపై నడుము లోతు నీరు నిలవగా.. కళ్యాణ మండపానికి వెళ్లేందుకు వంట పాత్రలనే వాహనంగా చేసుకున్నారు వరుడు, వధువు. నీట మునిగిన మండపానికి చేరుకుని పెద్దలు నిశ్చయించిన సమయానికే వివాహం చేసుకొని కొత్త జీవితానికి నాంది పలికారు.
ఆకాశ్-ఐశ్వర్య.. తలవాడిలోని ఓ గుడిలో పెళ్లి చేసుకోవాలనుకున్నారు. అయితే భారీ వర్షాల కారణంగా గుడి నీట మునిగింది. దీంతో సమీపంలో ఉన్న కళ్యాణ మండపానికి చేరుకోవాలని అనుకున్నారు. దీంతో పెళ్లికి తెచ్చిన అల్యూమినియం వంటపాత్రల్లో కూర్చుని మండపానికి చేరుకున్నారు ఆకాశ్-ఐశ్వర్య.
"మేము వచ్చి చూసినప్పుడు గుడి దగ్గర నీరు లేదు. దీంతో పెళ్లి అక్కడే చేసుకోవాలి అని అనుకున్నాము. కరోనా కారణంగా ఈ పెళ్లికి మేము చాలా తక్కువ మందిని ఆహ్వానించాం. వర్షం కారణంగా గుడి వద్ద నీరు ఎక్కువగా చేరుకుంది. కానీ సోమవారం చాలా మంచి ముహూర్తం ఉంది. అందుకే ఇదే తేదీకి విహాహం చేసుకోవాలని అనుకున్నాం. పాత్రల్లో పక్కన ఉన్న హాల్కు వెళ్లి పెళ్లి చేసుకున్నాం."
-ఆకాశ్, ఐశ్వర్య
ఆకాశ్, ఐశ్వర్య.. కేరళ చెంగనూర్లోని ఓ ఆసుపత్రిలో ఆరోగ్య కార్యకర్తలుగా పని చేస్తున్నారు.
ఇదీ చూడండి: వరదలతో కేరళ అతలాకుతలం- రెడ్ అలర్ట్ జారీ
