A child named as a Border: భారత్-పాక్ సరిహద్దుల్లో పుట్టిన 'బార్డర్' అనే చిన్నారి కుటుంబానికి వీసా మంజూరైంది. దిల్లీలోని పాకిస్థాన్ రాయబార కార్యాలయం వారికి పాస్‌పోర్ట్‌ను జారీ చేసింది. పాక్ నుంచి భారత్లోని పుణ్యక్షేత్రాల సందర్శనకు వచ్చి.. అనుకోకుండా అట్టారీ-వాఘా సరిహద్దు వద్ద చిక్కుకుపోయిన పాక్ హిందూ కుటుంబం ఎట్టకేలకు స్వదేశానికి చేరనుంది. ఈ చిన్నారి కుటుంబానికి దిల్లీలోని పాక్ హైకమిషన్ వీసా మంజూరు చేసింది.
లాక్డౌన్తో సరిహద్దుల్లో ఇరుక్కుపోయి..
పాకిస్థాన్లోని పంజాబ్ రాష్ట్రానికి చెందిన ఈ దంపతులతో పాటు మరో 97 మంది పాకిస్థానీలు భారత్కు వచ్చారు. ఆ తర్వాత కరోనా విజృంభించటం వల్ల లాక్డౌన్ విధించటం, పాక్ సరిహద్దులు మూసివేయడం సహా సరైన పత్రాలు లేకపోవటం వల్ల అట్టారీ-వాఘా సరిహద్దుల్లోనే ఉండిపోవాల్సి వచ్చింది. ఆ సమయంలో గర్భవతిగా ఉన్న బలమ్ రామ్ అనే వ్యక్తి భార్య అయిన నింబు బాయి ఈ నెల 2న పండంటి బిడ్డకు జన్మనిచ్చింది. కూలీ పనులకు వెళ్లిన ఆమెకు పురిటి నొప్పులు ప్రారంభం కాగా.. సమీప గ్రామాల ప్రజలు వచ్చి పురుడు పోశారు. వైద్య సహాయం అందించారు.
మరో పిల్లాడికి 'భారత్'గా నామకరణ
రెండోవేవ్ లాక్డౌన్ కన్నా ముందు తమతో పాటు 98 మంది పాకిస్థానీ పౌరులు భారత్కు వచ్చినట్లు బలమ్ రామ్ తెలిపారు. సరిహద్దులు మూసివేయటం వల్ల ఇక్కడే చిక్కుకుపోయామని చెప్పారు. పాకిస్థానీల్లో 47 మంది పిల్లలు సైతం ఉన్నారు. అందులో ఆరుగురు భారత్లోనే జన్మించటం గమనార్హం.
లాగ్యా రామ్ అనే వ్యక్తి సైతం తన కుటుంబంతో అట్టారీ సరిహద్దుల్లోనే నివసిస్తున్నారు. గత ఏడాదిలో జన్మించిన తన కుమారుడికి 'భారత్'గా పేరు పెట్టారు. జోధ్పుర్లో తన సోదరుడిని కలిసేందుకు వచ్చిన లాగ్యా రామ్ తిరిగి పాకిస్థాన్కు వెళ్లలేక అట్టారీలో ఉంటున్నట్లు చెప్పారు.
సరిహద్దులోనే ఉండేందుకు కారణం?
భారత్లో పుట్టిన పిల్లలకు పాస్పోర్టులు కావాలని సరిహద్దు అధికారులు అడుగుతున్నారని, తమ వద్ద తినేందుకే డబ్బులు లేవని వాపోతున్నారు పాకిస్థానీలు. తమతో వచ్చిన వారు సొంత దేశానికి వెళ్లిపోతుంటే తాము ఇక్కడే ఉండిపోవాల్సి వస్తోందని చెబుతున్నారు. తమను స్వదేశం పంపించేందుకు సహకరించాలని అధికారులను వేడుకుంటున్నారు.
ఇవీ చదవండి:
